Murag tarong si Senate President Tito Sotto nga niduso og taho kabahin sa giingong carrot ug vegetable smuggling sa Pilipinas ug giduso kang Presidente Bongbong Marcos. Apan dunay dakong sayop diay.
Ambot lang niining Sotto nga nagpataka na man lang. Daw witch hunt kining iyang gibuhat. Gusto pa niyang mosawsaw sa kagubot karon labi na nga panahon man sa mga rigodon sa lainlaing mga opisina. Ang usa sa maingon nato nga lucrative nga opisina sa kagamhanan mao man ang Bureau of Customs.
Nakaingon ko niini kay, basi sa mga taho nga nanggawas kabahin sa iyang report, dunay mga ngalan nga iyang giapil nga mga Sugboanon.
Apan ang media nga nag-cover mismo sa Bureau of Customs nakahibawo nga kining maong mga ngalan wala mosawsaw anang carrot ug vegetable smuggling. Gani, makaingon kita nga walay labot ang Cebu sa maong kalihokan.
Aw naa tuod mga balita nga dunay player sa maong klase sa smuggling sa Sugbo kadtong wala pay kampanya sa eleksyon. Niadtong tungora, ang maong player nagsigi og gamit sa ngalan sa Davao group aron makaduwa.
Apan naundang kini dihang nagpadala og sulat ang opisina ni Atty. Mans Carpio, bana ni Bise Presidente Sara Duterte ngadto kang District Collector Charlito Mendoza nga di tinuod ang gipang-atik sa maong player nga duna kiniy connect sa Davao.
Matod pa sa atong tinubdan, gitinuod ni District Collector Mendoza ang paggukod sa maong player mao nga nisuway kini og gamit og ubang mga broker.
Basta sa akong pag-aninaw sa carrot ug vegetable smuggling, walay labot ang Sugbo apan gituyo gyud og singit kini.
PAKSYON
Sa akong nasabtan, nagbangga karon ang duha ka dakong paksyon sa administrasyon ni Presidente Marcos. Ug mahinungdanon alang niining duha ka paksyon mao ang Bureau of Customs.
Ang ikatulo nga paksyon mao ang grupo nga giingong suod sa Davao City. Wala man gyud kini ma-confirm apan basin tinuod diay.
Interesting ang kalamboan niini sa Manila kay nanawagan na si Sen. Imee Marcos nga ikiha ang tanang may kalabotan sa carrot ug vegetable smuggling. Nagpaabot ko nga molihok sab ang ubang gamhanang grupo sa administrasiyong Marcos.
Gawas sa Manila, laing importanteng puwerto mao ang Port of Cebu. Mao nga bisan og wala malambigit og carrot ug vegetable smuggling, hisgutan gyud oi.
TIPIK LANG
Akong pangagpas nga bisan unsa ka professional ang economic core group ni Presidente Bongbong diha sa Cabinet, malawgaw lang kini tungod sa mga intramural sa mga paksyon.
Sama kini sa nahitabo sa panahon ni Marcos Sr. kaniadtong ubos kita sa diktadurya. Professional tuod ang economic team ni Prime Minister Cesar Virata. Apan, mayabag man gyud tungod sa mga cronies ug ni Imelda.
Magbahinbahin na man ang mga paksyon ug ilang mga tigsuporta sa giingong spoils of victory. Tipik lang kining Bureau of Customs. Sa akong tan-aw kinahanglan mag-consolidate ang gipangtudlo sa Philippine Ports Authority (PPA), Bureau of Internal Revenue (BIR), ug Commission on Audit (COA).
Sa sugal, aw nakahibawo na ba mo nga gidawat na ang resignation ni PCSO chief Royima Garma sa panahon pa mismo ni kanhi Presidente Rodrigo Duterte? (DM nako @anol_cebu)