Ang PLDT Business Office sa dalan Jones, siyudad sa Sugbo nigamit og solar energy sulod sa ilang peak office hours, alas 10:00 sa buntag ngadto sa alas 3:00 sa hapon, ug moganit sa naandang tinubdan sa enerhiya sa panahon nga dili na kaayo init ang silaw sa adlaw.

Atol sa pakighinabi sa Superbalita Cebu niadtong Biyernes, Hulyo 1, si Melissa Vergel de Dios, PLDT and Smart First Vice President ug Chief Sustainability Officer, nipasabot nga duha ang nag-unang tumong sa pagsagop sa PLDT sa solar energy.

Matod ni de Dios, una ang pagtabang sa kinaiyahan sa pagpaminos sa carbon emission nga hinungdan sa climate change ug pagpaubos sa bill sa kuryente labi na nga kanunay nagkataas ang presyo gawas nga dunay epekto kini sa kinaiyahan.

Gibutyag niya nga sayis porsiyento ang ilang unang gibanabana nga madaginot sa bill sa kuryente apan, base sa ilang operasyon, niabot kini og 12 porsiyento.

“Malaki, considerable na ‘yung amount..." matod ni de Dios nga dako na og matabang sa ilang pagdaginot sa gasto sa ilang operasyon.

Si Patrick Henry Panlilio, Spectrum Chief Operating Officer, nagkanayon nga malahutayon ug pulido ang ilang solar panels tungod sa pagsunod sa international standard ug engineering standard sa nasod.

"We're also a subsidiary company ng Meralco,” matod ni Panlilio, kinsa wa mobutyag sa kantidad sa ilang proyekto sa PLDT Jones.

Si Charlie Fabre, assistant regional director sa Department of Environment and Natural Resources (DENR) 7, nidayeg sa PLDT tungod sa ilang proyekto nga nagtabang sa pagpaminos sa polyusyon pinaagi sa paggamit sa renewable energy.

Dugang ni Fabre, ang kagamhanan nagdasig ug nag-awhag sa ubang kompaniya nga mosunod sa maayong ehemplo sa PLDT.

“Kung magkaproblema mo sa mga dokumento ug ubang rekisitos alang sa solar energy intallation, tawaga lang mi..” pasalig ni Fabre.

Gawas sa 150 ka solar panels, si Panlilio nidason nga ilang gimuntar usab ang unom ka units sa 25 kilowatt inverter.

Matod ni de Dios, ang PLDT Jones maoy ikatulo sa lima ka mga buhatan sa PLDT nga butangan og solar panels sa ilang phase 1 sa proyekto.

Unang natauran og photovoltaic (PV) panels mao ang Fortuna office sa dakbayan sa Mandaue.