Tulo na ka mga anak og kanhi presidente sa Pilipinas ang nahimo usab nga pamuno nasod. Nag-una kanila si kanhi Presidente Gloria Macapagal-Arroyo, anak ni kanhi Presidente Diosdado Macapagal. Gisundan siya ni kanhi Presidente Benigno “Noynoy” Aquino III, anak ni kanhi Presidente Corazon Aquino.

Ikatulo si Presidente Ferdinand “Bongbong” Marcos Jr., anak ni kanhi Presidente Ferdinand Marcos. Hayan nga duna pay ikaupat, si Bise Presidente Sara Duterte, anak ni kanhi Presidente Rodrigo Duterte. Apan magpaabot pa siya nga matapos ang unom ka tuig nga termino ni Presidente Bongbong Marcos.

Sa ato nang giingon dinhi, sa usa ka demokrasya, posibleng mahitabo ang tanan. Lakip na niini ang pagkahimong presidente sa anak og kanhi presidente. Kitang mga anak og mag-uuma ug mga yanong mamumuo, ari lang tas daplin aron moabiba kanila.

Matawag nato nga usa ka Malacañang returnee si Presidente Bongbong Marcos kay apil man siya sa paglayas sa Malacañang sa iyang amahan ug sa iyang pamilya tungod sa makasaysayanon nga 1986 Edsa People Power Revolution 36 ka tuig ang milabay ug atong gisaulog matag Pebrero 25.

Apan tungod sa gahom sa 31.6 milyones ka botos sa mga Pilipino sa miaging national ug local elections sa Mayo 9, gipabalik si Presidente Bongbong Marcos sa Malacañang. Ang mga botos nga iyang nakuha sobra pa kon doblehon ang 15.03 milyones botos nga nakuha sa iyang labing duol nga kaatbang, si kanhi Bise Presidente Leni Robredo.

Kon makasaysayanon ang iyang pagbiya sa Malacañang, makasaysayanon usab ang iyang pagbalik sa Palasyo nga nahimutang sa kilid sa Pasig River ug maoy puloy-anan sa presidente sa Pilipinas.

Si Presidente Bongbong Marcos nanumpa isip ika-17 nga pangulo sa Pilipinas sa udtong tutok sa Hunyo 30. Ang maong puwesto gihuptan sa iyang amahan sud sa 20 ka tuig, ang kinadugayan sa paghupot sa maong puwesto dinhi sa Pilipinas.

Ang iyang mensahi human sa iyang inugurasyon, sama sa iyang mensahe atol sa iyang kampanya, mao ang panaghiusa. Matod pa niya, “You, the people, have spoken. By your vote, you rejected the politics of division.”

Ug di na siya maghisgot sa nanglabay na, ang iyang hisgotan mao ang atong kaugmaon. Matod pa niya, “I am here not to talk about the past. I am here to tell you about our future.”