Bag-ong Lapu-Lapu City Lone District Representative Cynthia “Cindi” Chan niduso og duha ka mga balaudnon atol sa unang adlaw sa 19th Congress sa Hulyo 1, 2022, lakip na ang house bill nga magdeklarar sa Hunyo 17 matag tuig isip special non-working holiday sa siyudad agig paghandom sa anibersaryo sa Charter Day niini.

Gitataw ni Chan nga matag tuig sa hangyo sa City Government, ang Office of the President nagdeklarar sa Hunyo 17 isip special non-working holiday sa siyudad aron tugotan ang katawhan niini nga magselebrar ug makaapil sa tinuig nga selebrasyon niini.

Siya niingon nga panahon na nga kinahanglang ideklarar kini pinaagi sa balaod 61 ka tuig human napatuman ang Republic Act No. 3134, o nailhan nga Charter of the City of Lapu-Lapu, nga gipirmahan isip balaod ni Presidente Carlos Garcia niadtong Hunyo 17, 1961.

“In so doing, the people of Lapu-Lapu City will automatically be given an opportunity to recognize the men and women whose hard work and effort continue to contribute to their city’s progress as well as allow them to take part in celebrating the city’s accomplishments while ruminating on its historic founding in 1961,” tipik sa House Bill No. 739 ni Chan.

Laing balaudnon giduso usab ni Chan nga magtukod og Lapu-Lapu City District Engineering Office.

Iyang namatikdan nga ang first-class ug highly-urbanized nga dakbayan giserbisyuhan karon sa Cebu Sixth District Engineering Office sa Department of Public Works and Highways (DPWH), nga nag-alagad usab sa mga lungsod sa Cordova, Consolacion ug Mandaue City.

Gawas pa niini, si Chan niingon nga ang dakbayan sa Lapu-Lapu gibuwag na sa Sixth District Legislative District sa Probinsiya sa Sugbo aron mahimong lone district ang dakbayan niadtong 2009 pinaagi sa RA No. 9726.

Iyang namatikdan nga ang dakbayan sa Lapu-Lapu adunay kinatibuk-ang populasyon nga 497,604 ka mga residente nga nagpuyo sa 30 ka barangay base sa 2020 Census of Population and Housing, nga nagrepresentar sa 46 porsyento o halos katunga sa kinatibuk-ang populasyon nga giatiman sa Sixth District Engineering Office.

“With infrastructure development playing a key role in sustaining improvements in connectivity and transportation, overall production capacity, and income and employment generation, it is imperative that a separate and dedicated district engineering office be created tor the City of Lapu-Lapu,” tipik sa mabasa sa House Bill No. 731 ni Chan.

“Through this, it is hopes that the important functions of the Department in terms of planning, design, construction and maintenance of infrastructure, especially the national highways, flood control and water resources development system, and other public works will be carried out more promptly and efficiently,” kini nidugang.

Ubos sa giduso nga balaudnon, gitinguha ni Chan nga ilakip sa programa sa DPWH ang pagpadagan sa usa ka buwag nga opisina sa district engineering, diin ang pundo kinahanglan ilakip sa tinuig nga General Appropriations Act (GAA).

Una nang nisaad si Chan nga humanon niya ang tanang mga proyekto ni kanhi District Rep. Paz Radaza atol sa iyang termino, apil na ang pag-ayo sa dalan sanglit gipaabot sa katawhan nga mahuman niya kining tanan.