Usa ka yaya nga nalambigit sa pagpamaligya og illegal nga drugas nasikop atol sa buy-bust sa mga operatiba sa Drug Enforcement Unit (DEU) sa Talisay City Police Station sa alas 5:00 sa kaadlawon sa Dominggo, Hulyo 3, 2022.
Ang grupo ni Police Lieutenant Elwood Ebona, team leader sa DEU Talisay, maoy nangu sa buy-bust sa sityo Cassare, Barangay Cansojong, Talisay.
Si Ebona niila sa suspek nga si Mary Ann Villaber Cabuenas, 34, nagpuyo sa maong dapit.
Atol sa anti-illegal drug operation, ang mga operatiba nakasakmit og mga binulto nga shabu nga mokantidad og P170,000 subay sa standard drug price (SDP) sa Dangerous Drugs Board (DDB.
Ang hepe sa Talisay City Police Station, Police Lieutenant Colonel Randy Caballes, nibutyag nga pipila ka mga adlaw ang ilang pagpaniid ug nasuta nga si Cabuena usa diay ka yaya.
Ang kapulisan sa Talisay nisusi pa sa tinubdan sa drugas ni Cabuenas.
Kaso nga kalapasan sa paghupot ug pamaligya ang atubangon ni Cabuenas.