Buksan karong adlawa, Hulyo 4, 2022, sa Police Regional Office (PRO) 7 ang ika-27 nga kasaulogan sa Police Community Relation (PCR) Month sa dakbayan sa Naga, probinsya sa Sugbo.

Mangulo sa maong kalihukan si Police Brigadier General Roque Eduardo Vega, direktor sa PRO 7, nga adunay tema nga “Ugnayang Pulisya at Komunidad Tungo sa Mapayapa, Maayos at Maunlad na Pamayanan”

Sud sa usa ka adlaw, mohatag og libreng serbisyo caravan ang tanang units sa Philippine National Police (PNP) ug ubang ahensya sa gobyerno.

Matod ni Vega, sentro sa ilang mga kalihukan ang pagserbisyo sa katawhan sanglit dakog natampo sa kalampusan sa kapulisan ang abag sa publiko ngadto kanila.

Tungod niini, magpadayon ang pakigsandurot sa kapulisan ug sa katawhan aron mapalig-on pa ang relasyon ug kompiyansa alang sa malampusong pagpatuman sa kahusay ug kalinaw sa tibuok rehiyon 7.

Sa maong kasaulogan, ang matag City ug Provincial Police Offices mohimo usab og mga programa nga may kalabotan sa PCR Month.

Ang Cebu City Police Office (CCPO) sa pagpangulo usab sa hepe niini nga si Police Colonel Ernesto Tagle mihimo usab sa labing unang CD’s Cup 2022.

Niadtong Biyernes, Hulyo 1, 2022, gibuksan ang tulo ka adlaw nga shooting competition sa tanang mahiligon og armas, kini sa pakig-alayon sa Cebu City Advisory Group for Police Transformation and Development.

Ang kita sa maong torneyo ihapak sa mga proyekto sa advisory council ilabi na ang pagtabang sa komunidad nga angayan nga ayudahan nunot sa epekto sa pandemiya.

Matod ni Police Lieutenant Colonel Maria Theresa Macatangay, information officer sa CCPO, nga sukad gipatuman ang Comelec gun ban sugod Enero 2022 ug natapos sa Hunyo 8 2022, wala na makalusad og shooting competition ang kapulisan.

Nagpasabot kini nga naghinam-hinam na nga makabalik sa pagbansaybansay ang mga pulis sa ilang mga armas.

Lakip sa ilang gilusad ang duha ka adlaw 1st CD, CCPO Badminton Tournament for A cause nga gisalmotan sa dili mominos 330 ka mga indibidwal gikan sa lainlaing lugar sa Pilipinas.

Usa sa mga misalmot ang magsuong Tapales gikan sa Dipolog City nga sakop sa Philippine team diin maoy nahupot sa Open Category.

“Badminton is not only about winning. What is important is about playing hard, doing your best and putting up a good show for the spectators while building partnership with other members of the communit,” mensahe sa CCPO.