PASAKAAN og kaso nga kalapasan sa Republic Act 10591 o Illegal Possession Firearms ang kanhi kapitan sa barangay human madakpi sa mga awtoridad alas 4:50 sa kaadlawon niadtong Hulyo 2, 2022.
Ang suspek giila nga si Usop Sanggacala Aron, kanhi kapitan sa Barangay Rumirimbang, Barira, Maguindanao Province.
Gibutyag ni Criminal Investigation and Detection Group-Bangsamoro Autonomous Region (CIDG-BAR) Chief Lieutenant Colonel Bernard Lao nga gilusad nila ang law enforcement operation uban ang mga sakop sa Philippine National Police-Special Action Force (PNP-SAF) ug Marine Battalion Landing Team (MBLT-5) sa balay sa suspek sa Barangay Orandang, Parang sa maong probinsiya subay sa search warrant nga giisyu sa korte.
Nakuha sa balay ni Aron ang lima ka M16 Armalite rifles, usa ka M16 nga dunay grenade launcher alang sa 40 millimeter, usa ka M14 rifle,a usa ka .380 nga pistola, mga bala,a magazines ug mga eksplosibo.
Gikompirma sab ni Lao nga dunay koneksiyon si Aron sa mga criminal groups sa Barira ug mga kasikbit nga lungsod sa unang distrito sa Maguindanao.
Kahinumdoman nga midagan si Aron og bise mayor sa Barira sa milabay nga eleksiyon apan naparot.
Balhog karon ang suspek sa selda sa CIDG-BAR sa Cotabato City.