PAKYAS ang usa ka manglungkabay human kini nasapon sa akto nga iyang gikulkog ang kandado alas 2:45 sa kaadlawon, Hulyo 1, 2022, didto sa Quezon Avenue sa Barangay Zone 1, Digos City.

Giila sa Digos City Police Station ang suspek nga si Marjun Vallecra, 35, nagpuyo sa Barangay Bato Sta Cruz, Davao del Sur.

Nasayran nga naaktuhan ang suspek dihang iya nang gikulkog sa screw ang kandado sa tindahang KRAM Tires sa Quezon Avenue.

Didto gilayon kining gigunitan ug gipadapa sa mga miresponde nga pulis diin nakuha sa posisyon sa suspek ang usa ka .38 revolver nga dunay tulo ka mga buhing bala ug ang screw nga nagtaroy pa sa kandado.

Sumala sa Digos police, gipanubayan pa sab nila ang uban pang mga giingong manglungkabay sa siyudad sanglit dunay mga reklamo nga gipaabot ngadto kanila.

Gipasalig sab sa Digos police nga matag karon ug unya, naa sila gabantay sa palibot aron mapabilin ang kahapsay ug kalinaw sa Dakbayan sa Digos.