IPASULABI ang pagpaubos ug dili mohimo og kasamok sa mga balay kalingawan labi na kung mangahubog aron malikay sa pagkainitay nga mosangko sa disgrasya.
Kini ang gibutyag sa usa ka bar-goer nga si Daniel Jopson, 23, taga Gulfview, Davao City human sa usa ka duguon nga nahitabo sa usa ka bar sa Camus Street ning siyudad nga mikalas og usa ka kinabuhi niadtong Hulyo 2.
Niya pa, nga mas maayong ibutang pirmi sa hunahuna nga ang kinabuhi, kausa ra, diin dili angay nga mohimo og kasamok.
"Kon naay mga kasamok between sa duha ka parties, let the authority, the police pacify, kasi like nun taasan ng pride ang both parties, talagang delikado," sulti sa 23-anyos.
Dugang niya nga kinahanglan una kuno mosulod sa mga guests, kabalo kini sa mga regulasyon nga dili angay himuon labi na kung mahubog na.
Gisugyot sab sa batan-ong bar goer nga kihanglan mopanday ang konseho ning siyudad og balaudnon nga maghikyad og mga kondisyones sud sa bar, ug kung pakyas kining mahimo, dakong silot ang atubangon sa malapason.
Kahinumdoman nga namatay ang usa ka 21-anyos nga bar goer nga taga Bacaca Road, Barangay 19-B, Davao City human pusila sa usa ka doktor nga 31-anyos human sila nagkainitay gawas sa bar.
Bisan pa og dunay pulis sa panghitabo, sumala sa station commander sa San Pedro Police Station, Police Major Benkalin Baluan nga nahinabi sa dxDC RMN Davao, wala na nila mapugngi ang suspek diin kalit kining mobunlot sa armas ug gipusil sa makadaghang higayon ang biktima.
Tungod niini, gilayong nagpagula og pamahayag ang Davao City Police Office (DCPO) sa subo nga nahitabo.
"We are saddened by the incident that took place in Lugar Bar involving groups of persons while at the premises of the said resto bar reported to have been under the influence of intoxication... At present, the alleged person involved is now at the custody of San Pedro Police Station for appropriate filing of charges," tipik sa pamahayag sa DCPO pinaagi sa tigpamaba opisyal Police Major Ma. Theresita Plaza-Gaspan niadtong Hunyo 2.
Dugang sa pamahayag sa DCPO, usa kini ka isolated case diin ilang gipaningkamotan nga mapadali ang dugang pag-imbestiga sa krimen.
"We, therefore assure you all that that this is an isolated case. We are on top of these things, we will do everything possible as we expedite the filing of case the soonest," sumpay sa pamahayag.
Sa kasamtangan, temporaryo nga gikustodiya sa San Pedro police ang gitudlong suspek, diin suma ni Major Baluan, kasong homicide ang ipasaka nga kaso batok sa suspek.