Kanhi administrator sa public market sa Barangay Tabunok, Dakbayan sa Talisay apan negusyante na og dry goods gipusil patay sa nagbinugtong nga gunman nga nagmotorsiklo pasado alas 8 sa Dominggo sa gabii, Hulyo 3, 2022 sa Rabaya St., Barangay Tabunok.

Si Police Corporal Milfred Labitad sa Talisay Police Station, investigator on case, nga nahinabi sa Superbalita Cebu, niila sa biktima nga si Leonora Carlos, 57.

Matud ni Labitad nga si Carlos paingon na unta manirado dihang kalit nga may niabot nga usa ka lalaki nga nag-helmet ug naka mask ug dayon nipusil sa biktima. Ang gunman daling nisibat paingon sa South Road Properties (SRP).

Naigo sa ulo si Carlos hinungdan sa iyang hinanaling kamatayon. Dunay usa ka bala nga nahabilin sa nahitaboan nga gituohang gikan sa gigamit nga armas sa gunman apan wala pa masuta kon unsa nga kalibre.

Ang Talisay City Police Station dili pa makahatag og impormasyon sa posibleng motibo sa pagpatay, apan ang personal nga anggulo maoy usa sa ilang pagatutokan sa kasamtangan.

Ang manghod ni Carlos nga si Sita (tinuod ngan gipugngan alang sa seguridad), dali nga niabot sa tindahan human siya gipahibawo sa iyang pag-umangkon nga gipusil ang iyang manghud.

Matud ni Sita nga ang iyang manghud way kaaway sanglit maayong tawo.

“Ako na man ni siya giadvisan sa una nga manira og sayo kay ang akong kahadlokan kanang tulis bitaw. Duna ni siya anak nga tua na sa gawas unya kani iyang duha ka anak dinhi karon nga maoy iyang katabang kay iyang bana gani gioperahan man na bag-o lang,” matod ni Sita.