BAHIS-bahisan gyud sa mga pulis sa Davao City Police Office (DCPO) ang mga balay-imnanan ug dakpon ang mga malapason sa oras sa liquor ban human nga gimando ni Davao City Mayor Sebastian Duterte nga istriktuhon ang pagpatuman sa maong balaod sa siyudad.
Kini ang gibutyag ni Davao City Police Office (DCPO) director Police Colonel Alberto Lupaz atol sa usa ka hamubo nga press conference kagahapon nunot sa kalamboan sa kaso sa Camus shooting niadtong Hulyo 2, 2022.
Giingon ni Col. Lupaz nga ilang doblehon ang pag-istrikto sa kasamtangang oras niini nga ala una sa kaadlawon hangtud alas 8 buntag.
Gibutyag sab sa opisyal nga makasohan lamang nila ang mga nanag-iya og imnanan kung dunay mo-testigo, luyo sa mga istorya nga dunay kalapasan ang bar diin asa nahitabo ang rambol nga gikamatay sa usa ka 21-anyos.
Kagahapon sa buntag, giingon ni Mayor Baste nga wala kaayo na istriktuhan ang pagpatuman luyo sa bag-o lamang nabalik ang operasyon sa mga bar nunot sa pandemya.
"Di man siya entire na mao nahitabo kay wala kaayo nato gistriktuhan because we all know nga bag-o ra pud ta nakagawas sa pandemic, and medyo resistant pud kaayo mga tao na mouli og sayo kay ganahan sila molaag. For two years, wala sila nakagawas-gawas," ingon ni Mayor Baste.
Dugang sa batan-ong Duterte nga kinahanglan istriktuhan ang implementasyon niini aron malikayan nga mahitabo pag-usab ang nahitabo sa usa ka bar sa Camus Street.
"But, I suppose, kung istriktuhan gyud nato ang implementation sa liquor ban nato, we can avoid these incidents from happening, because when people are intoxicated with alcohol, bad things can happen in any point in time," niya pa.
Si Mayor Duterte nakatakdang mo-isyu og usa ka Executive Order (EO) mahitungod sa pag-istrikto sa pagpatuman sa City Ordinance 004-2013 kun liquor ban sa Davao City.
Nangayo sab og dispensa ang batan-ong mayor sa maong hitabo.
"Maintain lang usa nato until such time makita nato kung unsa ang mga adjustments," panapos niya.