OKUPADO karon ang Davao City Police Office (DCPO) sa usa ka lawom ug makuti nga imbestigasyon diin sukad sa pagsuwat ning balita ug human sa gihimong hamubo nga press conference sa DCPO Lunes, Hunyo 4, 2022 wala pa napasaka ang kaso batok sa doktor nga usa ka non-uniformed personel sa Police Regional Office (PRO) Davao Region gumikan nag-request pa kini og preliminary investigation pinaagi sa mga abogado niini suma sa DCPO.

Ala una niadtong Lunes, si DCPO director Police Colonel Alberto Lupaz miatubang sa mga tigbalita ug usa-usa niini nga gipangtubag ang mga pangutana sa mga media kung unsay kalamboan sa kaso.

Sumala ni Colonel Lupaz ilang giprotektahan ang matag bahin sa duha ka partido sa kaso, butang nga limitado ang mga impormasyon nga ilang mahatag sa publiko, gumikan na sab sa mando sa mga abogado sa matag bahin.

Giingon sab ni Colonel Lupaz nga dili mamahimong pangunahan ang piskalya ug prosekusyon busa mag-agad sila sa resulta ug kamandoan, dungan sa ilang pagpadayon sa paghimo og makuti nga imbestigasyon.

Gipahibalo sab ni Lupaz ang mando sa PRO-Davao Region sa DCPO nga kinahanglan, tanang mga affidavit nahan-ay kini, ug kinahanglan anaa sila sa pagtindog sa kamatuoran ug walay dapigan.

"Ang region naman sinabi sa amin na dapat ang mga affidavit properly done, at kami standing for the truth at walang panigan sa both sides," tipik sa giingon ni Colonel Lupaz atol sa hamubo nga press conference sa opisina niini.

Gipasabot sab niini nga wala nila gipagawas ang mugshots sa suspek nga 31-anyos gumikan na usab sa seguridad niini, sa nagpadayon nga imbestigasyon ug subay sa mando sa abogado.

"Hindi pa napalabas ang mugshot photo, for security reasons; puwede naman, pero mag-depende sa ilang mga lawyers," ingon ni Colonel Lupaz.

Giingon sab sa opisyal nga dili pa sila magpahigayon og pag-relib sa station commander sa San Pedro Police Station nga si Police Major Benkalin Baluan, sanglit nagpadayon pa ang imbestigasyon sa kaso.

"As of now, dili ta mag-relib, kay maputol ilang responsibility, dili ta mag-relib og chief of police [COP] unless ma-clear na ang case," pagpasabot ni Colonel Lupaz.

Alas 3:30 sa hapon kagahapon, nagpagula sab og pamahayag ang DCPO sa mga hinungdan nganong wala pa napasaka ang kaso batok sa suspek.

"After he [suspect] waived Art 125, he will be given ten (10) days to submit his counter affidavit with controverting evidence. From there, i-resolve sa fiscal whether there is probable cause to indict him for either murder or homicide or as the case maybe," pamahayag pinaagi sa spokesperson sa DCPO Police Major Ma. Theresita Gaspan, diin gidugang niini nga i-dungan ang counter affidavit sa mga dokumento atol sa pag-file sa kaso batok sa suspetsado.

Kahinumdoman, pito ka mga bala ang mipatay sa usa ka 21-anyos nga 'bar goer' kinsa giingong miulang sa kagubot gawas sa bar sa Camus Street, Davao City niadtong Sabado, Hulyo 2, 2022.