Makapalipay ang mga kalambuan karon nga nisugod na ang bag-ong administrasyon ilabi na sa mga magtutudlo sa publikong tunghaan kay nalakip sa saad ni Presidente Ferdinand “Bongbong” Marcos Jr. niadtong kampanya nga pasakahan ang suholan sa mga magtutudlo.
Di kini mahimo ni Presidente Bongbong kon wa siyay kaabag sa Kongreso nga maoy moandam niini, motuon unsay haum nga mahatag ngadto sa mga magtutudlo. Mao pa lang gani pagsugod sa ilang termino silang Senador Juan Edgardo “Sonny Angara ug Senador Loren Legarda aduna nay gisang-at gilayon nga balaodnon aron pasakahan ang suholan sa mga publikong magtutudlo.
Si Angara nisang-at sa balaudnon nga “Upgrading the Salary Grade (SG) Level of Teachers from 11 to 19.” Pasabot niini nga ang mga Teacher 1 nga nagdawat sa SG 11 nga suweldo, ang ilang dawaton mao na ang SG 19 nga suweldo. Kon ibase nato kini sa Salary Grade Standardization Law (SSL) 5, 4th Tranche nga ipatuman sa Enero 1 sunod tuig, ang SG 11 nagdawat og suweldo nga P27,000 samtang ang SG 19 anaa sa P51,357.
Ang tinguha ni Legarda ubos sa kang Angara nga ang mga Teacher 1 gikan sa SG 11 adto na sa SG 15 diin magdawat og P36,619 samtang ang mga teaching personnel sa State Universities and Colleges (SUCs) nga magsugod og SG 12 adto na usab sila sa SG 16 nga magsuweldo sila og P39,672. Gitinguha usab ni Legarda nga ang mga ang non-teaching personnel magdawat og P16,000.
Kining balaodnon ni Legarda nihaum sa saad ni Bongbong atol sa kampanya nga pasakahan niya ang suholan sa mga magtutudlo sa SG 15. Kon ang tinguha ni Angara ang matuman, dako kaayo kini og kaayohan sa mga magtutudlo apan kon kang Legarda ang suportahan, maayo kaayo kini kay sa walay kausaban sa ilang suholan.
Taas pa kaayo kini nga hisgutanan sa Kongreso aron hingpit matagamtam sa mga magtutudlo nga mausab na ang ilang suweldo nga sa hataas nga panahon wa matagad. Makahupay na kini isa ilang sitwasyon nga kasagaran na-loan na ang ilang mga suweldo ug sukli nalang ang ilang gidawat matag buwan.
Nabuhi ra man hinuon sila sa utang kay nakapaeskwela ug napakaon nilang ang ilang mga anak sama usab sa akong natagamtaman sa kasinatian sa akong amahan. (josephelvirtubilan@gmail.com)