Naglaom si Cebu Governor Gwendolyn Garcia sa padayong suporta sa Hunta Probinsyal sa mga programa ug mga lagda sa bag-ong termino niini sa pagsugod na sa ika-16 nga Sangguniang Panlalawigan sa Sugbo.
Atol sa gipahigayon nga labing unang sesyon sa Hunta Probinsyal sa Hulyo 4, si Garcia nipadayag sa iyang pagpasalamat sa elected board members sa pito ka mga distrito lakip na ang mga ex-officio members sa pakigduyog ug pagsuporta nila sa kagamhanan ilabi na sa panahon nga niatubang og hagit ug krisis ang nasud ug ang Probinsya sa Sugbo.
Iyang gihinumdoman ang pakigbatok sa probinsya sa African Swine Fever (ASF) ug coronavirus disease.
“Through all of these challenges, we learned how to work together. We gave spirit substance and reality to that word is sometimes most elusive to others and that is unity, kahiusahan nagkahiusa ang atong direksyon. Nagkahiusa ang atong tumong, nagkahiusa ang atong pagpangga sa mga Sugboanon,”matod ni Garcia sa iyang pakigpulong sa Hulyo 4.
Pipila ka oras sa wala pa ang sesyon, hiniusang nitambong ang mga opisiyal sa labing unang flag raising ceremony alang sa bag-ong termino.
Gihulagway ni Garcia nga usa ka mahinungdanong kalihukan ang maong adlaw sanglit iyang nakita ang panaghiusa sa tanang mga opisyal sa Kapitolyo bisan pa man og gikan sa managlahing partido.
“Mahinungdanon gyud kaayo ang atong mga board members and our vice governor under the legislative branch kay nakita nato in the past three years of my fourth term there were times nga ang akong executive order gikinahanglan nga palig-onan pa gyud with an ordinance and everytime wa gyud na mo talikod kanako ang provincial board,”matod ni Garcia.
Naglaom si Garcia nga pinaagi niini, mahatagan ang matag Sugboanon sa paglaom, positibong panglantaw ug pagtuo sa kahitas-an alang sa kalamboan sa Sugbo.
Subay sa pagsugod sa iyang bag-ong termino, naglaom usab ang gobernador sa padayong pagkugi sa matag bokal sa pag-abag sa matag programa sa Probinsya.