Cebu City Mayor Michael Rama. (File photo)
Cebu City Mayor Michael Rama. (File photo)

Rama mihulga pagtaktak sa laing 3K ka mga kawani sa City Hall

Human wa na ma-renew ang kontrata sa 500 ka mga kaswal ug job order nga empleyado sa City Hall niadtong Hulyo 1, 2022, nihulga na usab si Mayor Michael Rama nga tangtangon sa trabaho ang 3,000 ka mga empleyado kon dili mohimo sa ilang katungdanan.

Atol sa flag-raising ceremony sa Plaza Sugbo sa Lunes, Hulyo 4, 2022, subling nipahimangno si Rama nga ang mga empleyado kinahanglang mohimo sa ilang mga buluhaton o kon dili, ma-terminate.

“I want to announce today that if nothing improves and no program (is) being instituted, expect 3,000 employees to lose their jobs. I am serious about it,” matod ni Rama.

Matod ni Rama nga adunay evaluation human sa unom ka buwan aron madeterminar ang performance sa mga empleyado.

Sa pagkakaron, ang City Hall adunay 10,000 ka mga empleyado sa payroll, ug 5,000 niini ang mga job order, samtang 3,600 ang mga kaswal nga empleyado, ug 1,500 ang mga regular nga empleyado.

Gimandoan usab ni Rama ang tanang mga hepe sa nagkalainlaing departamento sa City Hall sa pagmonitor sa mga operasyon sa ilang tagsa-tagsa ka buhatan.

“I am directing all heads give them (employees) your cooperation, bring them where they should be. I do not wish to hear that they are not being given an assignment,” dugang ni Rama.

Matud pa ni Rama nga iyang tangtangon ang mga department head nga dili motuman sa ilang trabaho.

Niadtong Hulyo 1, gitinuod ni Rama ang iyang mga hulga human wala niya aprobahi ang renewal sa kontrata sa 500 ka mga empleyado nga napakyas sa pagpasar sa evaluation.

Ang pahimangno sa mayor ngadto sa mga empleyado nagsugod dihang nipagawas siya og memorandum niadtong Mayo 16 nga nagpahibawo nga ang kontrata sa tanang coterminous, casual, ug job order employees mapupos sa Hunyo 30.

Related Stories

No stories found.
SunStar Publishing Inc.
www.sunstar.com.ph