HUSTISYA ang singgit sa pamilya sa 19-anyos nga estudyante nga napatay sa doktor ug usa ka non-uniformed personnel sa Police Regional Office (PRO) Davao Region nga si Dr. Marvin Rey Andrew R. Pepino.
Usa ka Facebook account nga Justice for Amier Mangacop ang gimugna sa pamilya sa biktima diin asa naka-post ang daghang mga hulagway sa biktimang estudyante nga gipusil gawas sa usa ka bar sa J. Camus Extension, Tavera, Barangay 9-A, Davao City, niadtong Sabado sa kaadlawon, Hulyo 2, 2022.
Sa maong Facebook account, gipasibaw ang pipila ka mga sakto nga impormasyon nga wala makuha sa media human nga walay na-interview sa mga kabanay sa biktima.
Sama na lamang sa kompletong pangalan sa biktima nga Amierkhan Pulalon Mangacop, diin usa pa kini ka 19-anyos ug dili 21-anyos nga maoy nanggawas sa mga istorya sa media, ug usa ka Grade 9 student.
Dinhi sab gipasibaw ang bahin sa biktima, atol sa insidente. Sama sa, igo rang misundo ang biktima sa iyang ig-agaw, diin dili high sa ilegal nga druga ug wala naka-inom.
Giingon usab sa post nga usa ka manggihatagon ug matinumanon nga anak si Amierkhan, walay bisyo, dili ga-inom ug dili sab kini ganahan bisan sa aso man lang sa sigarilyo.
Daghan matud pa og pangandoy sa kinabuhi ang biktima, usa na niini ang makamuntar og usa ka car detailing and repair shop pag-abot sa panahon.
Sa pinakaulahing kalamboan sa kaso nga gipadangat sa Davao City Police Office (DCPO) pinaagi sa spokesperson, Police Major Ma. Theresita Plaza-Gaspan, nga nahatud na ang reklamo batok sa suspek didto sa fiscal's office, Hulyo 4, 2022, pinaagi sa San Pedro Police Station, apan ang suspek nag-request og usa ka preliminary investigation.
"After he [suspect] waived Art 125, he will be given 10 days to submit his counter affidavit with controverting evidence. From there, i-resolve sa fiscal whether there is probable cause to indict him for either murder or homicide or as the case maybe," pamahayag sa DCPO pinaagi ni Major Gaspan.