GIPAILAWOM og tulo ka adlaw nga pagbansay ang mga kuwalipikidado nga mga sakop sa Moro National Liberation Front (MNLF) aron mahimong sakop sa Philippine National Police (PNP) sugod niadtong Lunes, Hulyo 4, 2022 sa Camp Datu Nola Tambungalan sa Barangay Kitango, Datu Saudi Ampatuan, Maguindanao Province.

Si Commander Abdulqadir Dimalao, state chairman sa South State Revolutionary Committee sa MNLF, nagkanayon nga ang katuyoan sa pagbansay mao ang pag-andam sa MNLF alang sa integration program ngadto sa PNP.

Moabot sa kapin upat ka gatos ka manggugubat lakip na ang mga babaye ug lalaki ang misalmot sa rehearsal training.

Silang tanan naglaum nga makasulod sa nasudnong kapulisan sa Pilipinas.

Ang MNLF rehearsal training gisaksihan sa mga opisyal sa Office of the Presidential Adviser on the Peace Process (OPAPP).

Kahinumdoman nga sa final peace agreement sa MNLF tali sa gobyerno apil sa nasabutan ang integration program sa mga manggugubat niini sa Armed Forces of the Philippines, PNP, Navy ug Philippine Air Force.

Ang 1996 Final Peace Agreement nga gitawag usab nga Jakarta Accord gipirmahan niadtong Septyembre 2, 1996 sa Manila ni Manuel Yan nga nagrepresentar sa Republika sa Pilipinas ug Nur Misuari sa MNLF.

Sugod niini, daghan nang miyembro sa MNLF nga nipailawom sa integration program sa gobyerno.