GILAMAYAN na ang tulo ka mga tawo nga giingong naigo sa kilat alas 4 sa hapon niadtong Lunes sa Barangay Kinudalan, Lebak, Sultan Kudarat.

Gawas sa namatay, duna say duha ka tawo ang naangol sa maong hitabo.

Mga namatay giila nga sila Princess Shiecca Wakay, 20; Venn Alieh Lambak, 21; ug iyang igsuon nga si Ricky Lambak, 18, mga estudyante.

Samtang napaso sab ang mga lawas nila Nida Karon, 54, ug Jona Karon, 51, mga molupyo sa Barangay Barurao, Lebak ug naa nagpaalim sulod sa balay tambalanan.

Gibutyag ni Sultan Kudarat Provincial Police Office Director Colonel Tom Tuzon nga nangaligo ang mga biktima sa beach resort sa Barangay Kinudalan sa lungsod dungan sa makusog nga ulan.

Apan kalit nga mipaka ang kusog nga kilat ug didto miigo sa mga biktima nga niresulta sa pagkirig niini samtang naa sa tubig.

Daling gitabang ang mga biktima sa ubang mga tawo nga nangaligo usab sa resort ug gidala ngadto sa Lebak Doctors Hospital apan tulo kanila ang gideklarang dead on arrival.

Nagpahinumdom ang LGU-Lebak nga likayan ang pagkaligo sa dagat ilabi kung mag-ulan ug dunay pagpangilat aron makalikay sa samang hitabo.