Kataw-anan ra pod ning ubang mga tawo.
Kanhi dakong opisyal sa usa ka probinsiya nga pirmi lakbitan og batikos tungod sa pagtuo nga nangurakot kini wala na nakaagwanta, nanghagit og sumbagay.
Iyang gihagit og sumbagay ang tigbatikos niya, kanang publiko nga lugar aron daghan makakita.
Nagtuo seguro nga di siya suklan, hilabihang nakapanghagit, gipaagi pa gyod sa Facebook.
Susko kay misukol man sab ang gihagit.
* * *
Mibalos pod og butang sa Facebook nga gidawat niya ang hagit, mao nga hilabihang biboha.
Naghinamhinam na ang katawhan karon nga mosaksi sa maong sumbagay human sa batikosay.
Labi na kay ipubliko kini ug segurado nga i-live pod sa Facebook.
Sa giingon na, abangan ang susunod na kabanata.
* * *
Unsay rason nga nanghagit og sumbagay?
Siya ray makatubag pero mao ni obserbasyon sa mga tawo.
Kon dunay reklamo, ang himoon sa gireklamo, motubag.
Kon giakusar nga nangurakot, ang buhaton kay moisplekar kon unsay gibuhat nga tinarong nga walay sagol pangurakot. Bahalag lisod iisplekar basta buhaton lang tamas mahimo nga mapasabot ang gihisgotan nga reklamo.
Dili moinit ang ulo ug manghagit og sumbagay, labi na kay ang butang nga gireklamo dunay kalabotan sa gipanghimo sa maong opisyal samtang diha pa siya sa pangatungdanan.
Buot ipasabot, ang iyang gihimo sa una adunay kalabotan sa iyang trabaho isip opisyal sa gobierno.
Walay rason nga masuko kay tanang tawo dunay katungod nga mangayo og husay bahin sa kalihokan sa usa ka opisyal sa gobierno kay gadawat siya og sweldo matag bulan tungod sa iyang trabaho.
* * *
Unsay mahitabo kon madayon gyod ang maong sumbagay?
Una, kon maigo sa kumo, duna gyoy masakitan. Dunay modugo, dunay masamad, dunay mapiang.
Kon maigo unya masakitan, mosamot ang iyang kalagot ug mangita siya og paagi nga makabalos og igo sa iyang kumo, pwede sab siya mamatid bisan asang dapita sa lawas sa kontra.
Mahimong maglayog, mahimong matumba, masamad. Mahimo gani nga mag-paakanay.
Ngano man?
Kay wala may balaod nga sundon, matod pa, free for all nga sumbagay may himuon.
Siyempre, malipay ang mga tawo nga magtan-aw labi na og makaigo ang ilang gilabanan ug mahimong moabiba sila kon maayo manumbag ang ilang gilabanan.
Kon dunay referee, mahimo nga undangon ang sumbagay kon duna nay magka-dugo o duna nay masamad. Maayo lamang pod og neutral ang referee ug walay gilabanan kay segurado nga magubot gyod kon duna siyay labanan.
Sa pagkakaron, wala pay seguro kon madayon ba gyod kini kay bawosbawos man lang og tubagay sa Facebook.
Pero kon parehas sila nga “sports” lang, human tingali sa sumbagay, basin og magkaamigo ra pod sila.