Mahimong bahinon sa duha ka managlahing mga probinsiya ang Cebu Island kon madayon ang plano ni Lapu-Lapu City Mayor Junard “Ahong” Chan nga tukuron ang Probinsiya sa Mactan.
Apan dili pa kini prayoridad ni Chan sa pagkakaron ilabi na nga inanay pang mibangon ang dakbayan sa epekto sa pandemiya ug Bagyong Odette.
“At this point in time when we are still recovering from the effects of the pandemic and Typhoon Odette, a creation of a separate province is not in our utmost priority,” matod ni Chan.
Si Chan niingon atol sa news forum sa Martes, Hulyo 5, 2022, nga ang paghimong Probinsinya sa Mactan damgo ni anhing Kalihim Adelino “Addy” Sitoy, kinsa nagsilbi usab nga mayor sa Cordova.
Matod ni Chan, kini nga lakang makahatag og kaayohan sa kalamboan sa duha ka local government unit (LGUs).
“Dako kaayo na siya og ika tabang, nga para siguro ma picture out nako ang Lapu-Lapu, if they will become a Province of Mactan, siguro that will be the next little Singapore,” matod ni Chan.
Dugang ni Chan nga makaayo kini sa dakbayan tungod kay ang pagbaton og buwag nga kagamhanang probinsiyal magpasabot og dugang budget nga magasto aron mapalambo pa ang Lapu-Lapu ug Cordova.
Si Chan niingon nga iyang hangyuon ang iyang asawa nga si Lapu-Lapu City lone district representative Cindi Chan nga mo-lobby niini nga lakang sa Kongreso.
Samtang supak si Cebu Governor Gwendolyn Garcia sa plano sa paghimong probinsya sa Mactan.
“You know what my position is I was and I am and will always be against Sugbuak and I know that the people of Cebu agree with me that was shown in the 2007 elections when three congressmen wanted to break or dismember our province into four provinces and in the 2007 elections pwera buyag nangapildi silang tanan,” matod ni Garcia.
Sumala pa sa gobernador nga angay unang pangutan-on ang tanang mga mayor sa lalawigan sa Sugbo kon uyon ba kini sa maong plano.
“I don’t know if he was either misquoted or nakalitan lang si Mayor Ahong. Kani man gung mo file ka og bill nga mag create ka og imong probinsya unya dili lang ang Lapu-Lapu i-apil ang Cordova,” dason ni Garcia.
Usa sa gipanglantawan sa gobernador nga sa higayon nga masiak ang Probinsiya sa Sugbo makuhaan ang populasyon, aduna kiniy epekto sa National Tax Allocation (NTA) sa Sugbo.
Sugyot ni Garcia nga imbis nga buakon ang Sugbo mas maayo nga mopuno og laing congressional district aron mas mahatagan og dugang pundo nga ma-apod ngadto sa mga lokalidad nga labing nagkinahanglan.