Ang serbisyo nga makatagbaw sa mga nanginahanglan maoy gustong ipatuman sa bag-ong pangulo sa Department of Labor and Employment (DOLE).

Kini ang tinguha ug kamanduan ni Officer-In-Charge Regional Director Lilia Estellore, human siya niasumir sa katungdanan dihang nabakante ang maong posisyon gumikan sa pagbiya ni Undersecretary Victor Del Rosario, kinsa maoy temporaryong nagdumala sa maong buhatan.

“We will endeavor to be the best version of ourselves in rendering public service. I envision everyone in DOLE 7 to be in a happy environment where customer satisfaction is served best,” matod ni Estellore sa Hulyo 5, 2022.

Ang pamahayag giluwatan sa OIC-RD atol sa iyang pagpamulong atubangan sa mga kawani sa Dole 7 dihang nakadawat siya og komunikasyon gikan sa ilang Central Office sa Dole pagdumala sa maong departamento sugod Hulyo 1.

Si Estellore nahimong OIC assistant regional director (ARD) ug nahimong full-fledged ARD sa nakalabay nga tulo ka tuig.

Sa mga opisyal sa Dole sa Central Visayas, siya ang nag-inusara nga Career Executive Service Officer nga maoy rekisito sa Career Executive Service (CES).

Sa pagdumala ni Estellore, iyang unahon ang pagsiguro nga ang mga kawani sulod sa iyang departamento mahatagan og security of tenure, mo-improve ang ranggo ug kwalipikado sa serbisyo.