Tun-an ni Cebu Governor Gwendolyn Garcia kon unsa ang mga pamaagi nga mapagaan sa mga Sugboanon ang epekto sa pagsaka sa presyo sa lana sa nasud.
“Duha man gud na. We have no control over the price of fuel but with the rise of the price of fuel, daghan pod ang naapektohang commodities and that is what we are trying to study karon,”matod ni Garcia.
“First of all, how can we mitigate the impact of the rise of prices of food and uban pa nga basic nga kinahanglan sa tawo? I just need to be able to study it more carefully kay this, its good for one district but to do it provincewide, what is also the impact sa atong resources,”dugang niya.
Subay niini, gitan-aw ni Garcia ang pagbanhaw sa Tindahan sa Kapitolyo kon diin mahimong makapalit ang mga Sugboanon sa mga labing gikinahanglan sa mas ubos nga presyo.
“Perhaps akong tan-aw ani, we will focus more on being able to cushion the impact of rising prices of these commodities. Perhaps I would like to revive the Tindahan sa Kapitolyo. Subsidized na ang price sa rice, sa canned goods, of milk and other so we will study on that,” matod ni Garcia.
Ang Tindahan sa Kapitolyo nahimugso atol sa pagsulbong sa pandemya sa nasud.
Tungod kay sagad sa mga Sugboanon nawagtangan og trabaho sa maong higayon tungod sa pagpatuman sa lockdown, gipahimutang sa Probinsya ang pagbaligya og mga produkto sa mga Sugboanon sa labing ubos nga presyo.
Sa ingon, may makaon kini sa matag adlaw. Dungan usab kini sa mga programa sa Kagamhanan nga Sugbusog, diin giawhag ang tanang mga Sugboanon sa pagpananom sa nataran o backyard gardening aron mamenosan ang gastuhonon ug may makaon samtang nag-atubang sa krisis.
Subay niini, giawhag ni Bise Gobernador Hilario Davide III ang mga bokal sa probinsya sa Sugbo sa pagsusi sa mga lakang ug balaudnon nga makatabang sa mga Sugboanon sa probinsya sa nasinating epekto sa nagpadayong pagsaka sa presyo sa petrolyo sa nasud.
Matod ni Davide nga sa pagsaka sa produktong petrolyo, apektado usab ang mga pang adlaw-adlaw nga panginahanglan sa mga tawo.
“More challenges are moving in the horizon, the rising costs of fuel that has pushed the prices of essential goods through the roofs is burdening for the Cebuanos...Affected tang tanan kay mga presyo sa essential goods mosaka pod with the increase of cost sa fuel so we will need measures, legislating measures to address this to anticipate this problem para mahatagan nato og pananglitan opportunity ba ilabi na sa mga naglisod...depende nana sa mga legislators,” matod ni Davide.