Patay ang lalaki samtang naangol ang iyang kaipon human sila gipangdunggab niadtong Lunes, Hulyo 4 sa gabii, sa East Binabag, Barangay Tayud, lungsod sa Consolacion.
Si Ranilo Goc-ong, 40, ulitawo, taga Barangay Sta. Cruz, Lungsod sa Liloan dead-on-arrival (DOA) sa tambalanan sa Mandaue.
Si Goc-ong nakaangkog daghang mga samad dinunggaban sa nagkadaiyang parte sa kalawasan.
Samtang samdan sa iyang tiyan ang kapuyo nga si Christel Mae Silaya Bacus, 26, taga-East Binabag, Brgy. Tayud, Consolacion, kinsa naa sa (VSMMC).
Samtang wala pa madakpi sa kapulisan si Norwel Cabaña, 38, taga-Barangay Tongkay, dakbayan sa Toledo.
Ang suspek gikatahong kanhi kapuyo ni Bacus.
Si Police Staff Sgt. Roel Aquino, imbestigador sa Consolacion Police Station nga nahinabi sa Superbalita Cebu, nagkanayon nga selos maoy motibo sa krimen.
Ang suspek gikatahong nagselos sa mga biktima human wala makadawat nga gibuwagan ni Bacus.
Ang mga biktima padulong unta sa Liloan sakay sa ilang motorsiklo.
Gikatahong giatangan sa suspek ug gipangdunggab.
Wala na matabang ang biktima namatay sa dihang gidala sa tambalanan, talandugon sab ang kahimtang sa babaye.
“Iyaha ning giatangan ang mga biktima. Pagsakay sa motorsiklo gipangdungab. Nagselos siya gusto sigurong makigbalik unya duna na may bag-ong ka live-in ang babaye,” dugang ni Aquino.
Kasong murder ingon man frustrated murder ang giandam sa kapulisan batok sa suspek.
Nagpadayon ang hot pursuit operation batok ni Cabaña ning pagsuwat aron paghatag og hustisya sa mga biktima.