Gipaalarma sa Waterfront police station ang asawa nga manager sa usa ka division sa dakong kompaniya sa siyudad sa Sugbo human nasakpan sa iyang bana uban sa iyang kauban ra sab sa trabaho sud sa usa ka condo unit.
Wa damha sa asawa ug iyang kauban nga lalaki nga manager sab sa laing division sa ilang gialagaran nga kompaniya nga mapagya ang ilang tinagoang relasyon kagahapon, Hunyo 5, 2022.
Gitago lang sa ngalan nga Juliana ang asawa samtang ang gikarelasyon niini gitago lang sa ngalan nga Deblin.
Naabtan pa sa mga pulis ang maanyag nga si Juliana nga gibana-bana nga naa pa sa 40 ang pangidaron sulod sa lawak uban ni Deblin.
Sigun sa kasaligang tinubdan sa kapulisan nga gisundan sa bana, usa ka negosyante, ang iyang asawa nga si Juliana sakay sa service vehicle sa kompaniya nga gimaneho sa kabit niini.
Natingala ang bana nga nisulod sa usa ka condominium ang ilang gisakyan.
Tungod niini, gipanid-an sa bana kon asa manulod nga kwarto ang duha. Sa dihang nasuta sa bana ang lawak nga gisudlan, dali siyang nanawag og pulis aron ipadakop.
NAG-SORRY
Apan sa dihang nag-abot ang bana ug ang asawa sa police station, nangayo og pasaylo si misis sa sayop nga iyang nahimo.
Tungod sa dakong gugma niini ngadto sa iyang asawa, gipasaylo ra usab niya kini dungan sa hangyo nga dili na mobalik sa pagpakig relasyon sa maong lalaki nga usa usab ka dakong minyo.
Ang hepe sa Waterfront Police Station sa Cebu City Police Office, Maj. Henry Orbiso, nitug-an nga dili na mosang-at og reklamo ang bana.
Dungan ra sab sila og pauli sa ilang balay sa Brgy. Pardo, dakbayan sa Sugbo.
“Buotan kaayo ang bana, gipasaylo ra gyud niya ang iyang asawa bisan iya ning naabtan nga dunay kauban nga lalaki sa kwarto,” matod ni Orbiso.
Ang mga kauban sa trabaho nga nagdumili sa pagpaila nakurat sa kasayuran, sanglit wala sila magtuo nga adunay relasyon ang duha ka dagkong opisyal sa ilang kompaniya.
Si Juliana aduna nay duha ka anak nga dagko na ug giingong arangan ang kahimtang sa kinabuhi sanglit negosyante usab ang bana samtang mao usab ang gikarelasyon niini nga si Deblin.