DUL-AN P2 ka milyon nga kantidad sa gituohan'g shabu ang nasakmit sa kapulisan sa managlahing operasyon sa Sugbo gikan sa Martes sa gabii hangtud sa Miyerkules sa kadlawon, Hulyo 6, 2022.
Unang nadakpan ang usa ka public school teacher sa lungsod sa Tuburan atol sa buy-bust operation sa Martes sa alas 6 sa gabii, Hulyo 5, 2022.
Ang suspetsado giila nga si Brendo Aringay Villafranca, 34 anyos, taga Barangay Kansi sa maong lungsod.
Nakuhaan siya'g pinakete sa gituohang shabu nga mobalor sa P2 ka libo lakip ang buybust money ug ang motorsiklo niini.
Sa ikaduhang ronda, ang inahan nga adunay anak nga napriso nasikop sa mga ahente sa Philippine Drug Enforcement Agency sa Central Visayas (PDEA 7) pasado alas 11 sa Martes sa gabii didto sa iyang panimalay sa Bamboo Village, Barangay Basak Pardo, siyudad sa Sugbo.
Ang dinakpan giila nga si Lilia Hernane, 52 anyos, kinsa nasakmitan ug shabu nga motimbang sa lima ka gramos nga mokantidad sa P34 mil.
Samtang didto sa Barangay Cayang, dakbayan sa Bogo, kapin sa P1 ka milyon nga shabu nga nasakmit sa kapulisan atol sa buybust operation alas 12:20 sa Miyerkules sa kadlawon.
Si Lieutenant Colonel Florendo Fajardo, hepe sa Bogo Police Station, miila sa dinakpan nga si Jame Paul Yuson Villegas, 30, apan ang ka kunsabo niini nga si Deo Quontana padayon pang gipangita sa tinugyanan sa balaud.
Nasuta nga si Villegas ug Quontana nahimutang sa lista sa Bogo Police Station isip high-value individual.
Ang drugas nga nasakmit gikan kanila mitimbang sa 192.48 gramos nga mobalor sa P1,258,816.
Si Fajardo mibutyag nga ang suspek ilang nasikop sa joint anti-drugs operation uban nila ni Police Major Joey Bicoy sa Provincial Intelligence Units.
Sa ikaupat nga buybust operation sa alas 12:38 sa kadlawon sa Miyerkules, naposasan sa Talisay City police ang 42 anyos nga call center agent atol sa buybust operation sa Barangay Bulacao, siyudad sa Talisay.
Ang suspetsado giila nga si Ronnel Ledesma Cabaron, usa ka high value individual nga nag-operate sa maong dakbayan
Nakuha gikan kaniya ang 50 gramos nga drugas nga balor og P340,000 ug buybust money.
Samtang nakadakop usab ang Mambaling police station og laing high value individual sa Sitio Tinabangay, Barangay Mambaling dakbayan sa Sugbo.
Ang suspek nga si Jojie Diaz, 27 anyos nga taga Sitio Huyong-huyong sa maong barangay nakuhaan og 53 gramos sa gituohang shabu nga balor og P360,400.
Ang mga dinakpan mag-atubang og kasong kalapasan sa Republic Act 9165 o Comprehensive Dangerous Drugs Act of 2002. (GPL, AYB, BBT)