MGA tulisan nga napatay sa mga awtoridad gitumbok nga nalambigit sa sunod-sunod nga mga tulis ug gun- for-hire sa Maguindanao Province.
Giingong misukol ang mga suspek nga sila Miguel Villadar ug Jonathan Solaiman, pulos molupyo sa Barangay Labungan, Datu Odin Sinsuat sa maong probinsiya sa mga pulis, hinungdan nga napatay alas 9:40 sa gabii, Martes, Hulyo 5, 2022.
Gibutyag ni Datu Odin Sinsuat Chief of Police Lieutenant Colonel Erwin Tabora nga nakadawat sila og tawag gikan sa sekyu nga si alyas Nogi nga siya gi-hold-up sa duha ka tawo nga sakay og motorsiklo sa Sitio Fatima, Barangay Tamontaka sa nahisgutang lungsod.
Daling niresponde ang mga sakop sa Datu Odin Sinsuat Municipal Police Station ug Provincial Mobile Force Company nga gipangulohan ni Lieutenant Colonel Assir Balindong.
Nasubay sa mga pulis kon asa miikyas ang mga suspek hinungdan nga nagmuntar gilayon sila og checkpoint sa Barangay Crossing, Awang sa lungsod ug sa dihang sitahon na unta sa mga pulis, mga suspek mihulbot og armas ug nagpabuto.
Napugos ang mga awtoridad sa pagbalos, hinungdan nga napatay ang mga suspek.
Narekober sa mga pulis gikan sa mga suspek ang usa ka kalibre .45 nga pistola, magazine, mga bala, bag nga dunay sulod sa kinawat nga kuwarta ug mga selpon.