DILI matukib ang kalipay sa mga tawo nga nakigduyog sa kasadya human nakakaon sa lamiang mga lechon nga baboy ang gitagana alang sa katawhan atol sa gipahigayong Thanksgiving Party ug pagsaulog sa 1st Lechon Festival sa lungsod sa Maragusan, Davao de Oro niadtong Martes, Hulyo 5, 2022.

Nasayran nga mokabat sa 240 ka mga lechon ang gisaw-an sa mga molupyo diin 120 niini gikan ni Mayor Lito Cabalquinto isip iyang pasalamat ngadto sa katawhan sa pagpili kaniya isip bag-ong amahan sa lungsod.

Samtang ang laing 120 ka lechon nga baboy hinatag sab sa magtiayong Congressman Ruwel Peter Gonzaga ug Governor Dorothy Montejo-Gonzaga.

Gawas sa lamiang mga lechon, duna say gipahigayon nga libreng serbisyo nga gilangkuban sama sa gupit, manicure ug pedicure pinaagi sa opisina sa Public Employment Service (Peso-Maragusan).

Mokabat sa 24 ka mga barangay sa lungsod ang nakigduyog sa selebrasyon, apil na ang mga opisyales ug functionaries, kooperatiba ug uban pa.

Ang selebrasyon nagpadayag sa dakong suporta sa katawhan nga gihatag ngadto sa bag-ong mayor nga si Cabalquinto.

Gipakita sab sa maong selebrasyon nga init nga gidawat sa katawhan ang administrasyon ilawom sa bag-ong liderato.