TANGGONG na sa prisohan ang usa ka lalaki kinsa nangluba-patay sa iyang katagay og tuba pasado alas 10 sa gabii, Hulyo 3 didto sa Sitio Mawa, Barangay Lawa, Don Marcelino, Davao Occidental.
Ang suspek nailhang si alyas Mario samtang ang biktima giila lamang nga si alyas Jun.
Subay sa impormasyon gikan sa kapulisan sa Don Marcelino Municipal Police Station, nasayran nga perte pang pangatawa sa duruha samtang nagtagay og tuba.
Apan dihang nangahubog na diha sa tugkaran sa suspek, naglalis ang duruha gumikan sa manok.
Giingon nga perteng sukoa sa biktima kay giingnan siya sa suspek nga talawan ang mga manok niini.
Sa kapungot sa biktima, iyang nasumbagan ang suspek, hinungdan nga mikuha'g kutsilyo ang suspek dayon gidunggab ang biktima tumong sa ilok.
Dead on arrival ang biktima sa usa ka ospital sa Malita Poblacion, samtang ang suspek boluntaryo nga mitahan sa kaugalingon sa kapulisan.
Gipasakaan na og kaso ang suspek didto sa korte samtang ang biktima gihaya na sa iyang mga kabanay.