MAR MANUS, JR.
Basak-Iba, Lapu-Lapu City, Cebu
Milagingling na sa kalikopan
ang hagkot nga kahilom
sa kagabhion,
mihapdos na sab ang samad
sa akong kasingkasing
samtang naghandom ako
sa minahal kong amahan
nga mitaliwan na sa laing kalibutan.
Buot kong piyungon ang akong
mga mata aron malimot ako
sa masakit kong kasinatian.
Apan wala pa gayud mosapigad kanako
si Nanak – ang hara sa katulugon
busa gipakitiw ko na lang ang akong
mga tudlo diha sa mga tekla
sa naghukdong nga laptop
aron hugpungon ang mga pulong
nga nangapyot sa laagan
kong handurawan.