Moabot sa 50 sa kinatibuk-ang 51 ka mga lokalidad sa lalawigan sa Sugbo ang nisaad na nga moapil sa umaabot nga selebrasyon sa Pasigarbo sa Sugbo sa Agusto.

Kini maoy gipahibalo sa Kagamhanan sa Probinsya atol sa labing unang general assembly sa mga mayor sa Capitol social hall sa Hulyo 6, 2022.

Subay niini, gisaad ni Cebu Governor Gwendolyn Garcia nga mohatag og pundo alang sa mga lokal nga kagamhanan nga moapil sa maong kalihokan.

Si Garcia nisaad og moabot P1 milyon nga assistance sa mga mo-participate nga mga lokalidad sa Sugbo.

Samtang moabot sa P1.5 milyones nga pundo usab alang sa mga lokalidad sa isla sama sa Bantayan ug Camotes.

Sayo sa samang adlaw nagtigom ang mga tourism official gikan sa 50 ka mga lokalidad ug component cities sa Sugbo aron mahisgutan ang pagpangandam sa maong kalihukan.

Ang ‘festival of festivals’ lakip sa mga kalihukan alang sa month-long celebration sa founding anniversary niini.

Wala na makapahigayon sa maong kalihukan sulod sa duha ka tuig subay sa pagsulbong sa coronavirus disease (covid-19) sa 2020.

Ang ika-453 nga founding anniversary sa Sugbo karong Agusto 28, 2022.