Mga duwa karon:

7:30 pm- JTR

vs. Bogo City

9:00 pm- Good Shepherd vs. Tuburan

Panagtigi sa title contenders maoy pormal nga moabli sa 1st Dongkoy Cup Open Invitational Basketball Championships karong gabii, Hulyo 8, 2022, sa gipanindot nga sports complex sa lungsod sa Asturias, Sugbo.

Ang Journey To Recovery (JTR) squad, ang kampiyon sa 2019 Cebu City Invitational Cup, mosuway sa katakos sa Bogo City nga gikombinasyonan sa local talents ug reinforcements sa ubang dapit.

Lakip sa mobagnod sa JTR ang flashy-pointguard nga taga Balamban, kasikbit nga lungsod sa Asturias, nga si Gileant “Bagli” Delator.

Sugdan ang engkuwentro karong alas 7:30 sa gabii.

Sa dili pa ang aktuwal nga kompetisyon, adunay usa ka hamubong programa, diin ang bag-ong napiling mayor sa lungsod nga si Dana Andrew M. Dumdum o naila sa kadaghan nga Mayor Dongkoy, mopaambit sa iyang mensahe.

Sa main game, ang Good Shepherd-Toledo nga pangulohan sa beterano ug kanhi PBA star nga si Jojo Tangkay, mosakbang usab sa Tuburan Coffee Makers nga gibituonan sa laing beteranong commercial star nga si Alfred Belande, kanhi sakop sa SWU Cobras.

Lima ka teams ang nisalmot sa lega nga mosunod sa single elimination format, apil na ang bag-ong naporma nga Fastbreak Solutions ni Atty. Danrey Cabatana.

Mokabat og dul-an sa P300,000 nga ganting salapi ang nakahan-ay sa maong torneyo nga nagsilbing usa sa dakong mga kalihukan alang sa naghinangat nga kapistahan sa lungsod.