Dunay mga pagduda nga si Presidente Bongbong Marcos (PBBM) usa ka tawo nga huyang og baruganan nga dali rang madala sa sa iyang mga higala ug kaalyado sa politika. Gipakita man gud niya panahon sa kampanya nga dili siya makig-away, bisan motubag na lang sa mga pagsaway batok kaniya ug sa iyang pamilya.

Apan lahi ang gipakitang prinsipiyo ni PBBM sa dihang iyang gi-veto ang House Bill (HB) 7575 nga magtukod og Bulacan Airport City Special Economic Zone and Freeport Authority (BACSEZFA) sa Bulakan town.

Ang maong proyekto gipaluyohan ni Ramon Ang, president &CEO sa San Miguel Corporation nga usa ka campaign supporter. Usa kini ka pribadong proyekto nga mobalor og P740-billion.

Kining maong balaudnon gisuportahan sa 21 ka mga senador. Way misupak niini apil na ang iyang igsuon nga si Senador Imee Marcos.

Si Senador Joel Villanueva nga maoy nangamahan niini sa Senado gianugonan sa maong balaudnon tungod kay makahatag kini og daghang mga trabaho sa iyang mga paisano sa Bulacan.

Si Senador Chiz Escudero nagduda kon makahimo ba pag-veto si PBBM sa usa ka balaudnon nga gipasar dili sa iyang administrasyon.

Apan si Senate Pesident Tito Sotto niingon nga nahitabo na kini sa panahon ni Presidente Joseph Estrada nga gi-veto sa dihang si Gloria Macapagal Arroyo na ang presidente.

Si incoming Senate president Migs Zubiri miangkon nga katungod sa Presidente ang pag-veto sa balaudnon.

Iya usab nga giila ang posisyon sa Department of Finance nga wala na itugot ang pagtukod og economic zone apan gitugot kini sa Corporate Recovery and Tax Incentives for Enterprises (CREATE). Nagduda si Senador Imee Marcos nganong wala makit-i kining mga item nga gitumbok ni PBBM.

Bisan pa sa maong veto, nagkauyon ang mga senador nga mopalabang sila og laing balaudnon kalabut niini diin ila nang tangtangon ang mga items nga gisupak ni PBBM.

Si Kongresista Sandro Marcos, anak sa Presidente, miingon nga uyon si PBBM nga magbutang og ecozone sa maong dapit.

Nagtuo siya nga dunay alternative bill nga i-file sa Kongreso sa dili madugay. Makahimo usab sa pagpadayon pagtukod sa airport samtang tul-iron pa ang mga probisyon sa ecozone.

Kining baruganan ni PBBM angay daygon kay nagpakita siya nga bisan kon supporter niya sa milabay nga kampanya, iya gayud nga pasundon sa balaud sa walay kaigkog.

Wala usab siya mahadlok nga mokuntra kaniya ang iyang mga kaalyadong senador, apil na ang iyang maguwang, nga maoy nagpasar niining maong balaudnon. Mao man kaha kini lider nga atong gusto ang walay gipinig ug gipili.

* * *

Manghinaut kita nga kining iyang gipakita ngadto sa mga senador mao usab ang iyang buhaton ngadto sa kadagkoan sa Department of Agriculture (DA) ug sa Bureau of Customs diin naglublob ang mga smuggler.

Daghang miawhag kang PBBM nga tangtangon ang mga dagkong opisyal sa DA ug sa Customs aron malimpiyo ang maong mga buhatan. (mannyrabacal1144@gmail.com)