Dali ra kaayo mahan-ukan ang mga basura sa pagbasol matag higayon nga mobaha na sa Metro Cebu basta magsagunson ang uwan.
Sama sa nahitabo sa Miyerkules, diin daghang mga karsada sa southern part sa Cebu City ug Talisay ang gibahaan. Di na karsada ang makita kay sama na kini og sapa. Unya gibasol dayon ang daghang mga basura nga sama og mao ray bugtong hinungdan sa mga baha. Apan sama sab ni og usa ka relasiyon nga komplikado. Komplikado ang hinungdan sa baha kay daghan ang nakaingon niini, usa lang ang basura.
Lahi kaniadto, ang kabukiran karon gipulihan na sa mga subdivision. Wa nay mga kahoy ug gipang-ungad pa aron mabutangan og mga balay. Gipangkongkreto ug ang mga daplin sa karsada gipangbutangan og mga drainage system. Kay kongkreto man, di na makatuhop ang tubig nga lahi sa kaniadto nga kakahoyan pa ang kabukiran. Ang tanang tubig padung na sa ubos sa kabukiran.
Lahi na sab ang kadaghanon sa uwan karon ug kaniadto mao nang mas grabe na ang baha. Tungod kini sa global warming. Mas daghan ang tubig ug mas dali nang makauwan karon itandi kaniadto. Di na gud magtultol ang panahon kay ang ting-init mahimong uwanon.
Naa pa ang pagsaka sa dagat nga hinayhinay apan kanunay. Kaniadto, ang mga dapit sa baybayon nga di maabot sa tubig, masanapan na karon. Kini nga mga hinungdan maoy naghimong komplikado sa suliran sa baha.
Kon duna may pagahimuon nga drainage master plan, kinahanglan nga bag-uhon kini aron mapahaom sa panahon. Ang Department of Public Works and Highways (DPWH) gikinahanglang mopadagko na og maayo sa mga drainage nga makasarang sa kadaghanon sa tubig.
Kon duna may himuong solusyon sa baha, kinahanglang komprehensibo, kanang molanat og daghan pang katuigan, di sama karon nga ingon sa tuhiktuhik lang ang solusiyon.
Unya kanang drainage nga dunay kalapsan, di kay prisuhon ra ang tubig.