Kon dili mahuman ang dugang tulo ka andana sa Cebu City Medical Center hangtod sa Oktubre 28, 2022, ipakanselar ni Mayor Michael Rama ang kontrata uban sa kontraktor.
Ang pamahayag gibuhian ni Rama kinsa maoy responsabli sa pagpabarog sa unang unom ka andana sa pampublikong tambalanan sa dakbayan atol sa iyang pagbisita sa miaging adlaw diin dismayado ang mayor sa iyang nakita.
“What is the purpose of having a contract and then it is not being completed? Because I can wait anyway, my term is three years, and I’m serious because di ko gusto og lies,” matod ni Rama sa post sa Cebu City News & Information.
“I-cancel. Mao nay akong order. Di ta magpakita nga pwerte gyung arat arat (dali) pero we have to put everything accordingly kay naa man mi gisabotan sa wa pa ko nipirma sa kadtong notice to proceed, contract with Sicat contractor,” dugang ni Rama.
Ang bahad sa mayor suportado ni Bise Mayor Raymond Alvin Garcia kinsa maoy presiding officer sa Cebu City Council nga gilangkuban sa 18 ka mga local legislator ug 12 kanila kauban ni Rama sa Partido Barug sa miaging piniliay.
“I will go with Mayor Mike kay it is already long overdue unya dugay naman nang kontrataha napirmahan and we know nga ang pinaka-importanteng aspeto karon nga kinahanglanon sa mga tawo mao ang hospital services. So it is very important that CCMC will be finished on time. I will support the stand of the mayor,” matod ni Garcia.
Ang M.E. Sicat Construction nga maoy gihatagan sa award- sa P916.8 milyunes nga phase 4 sa CCMC niadtong Abril 6 karong tuiga maoy kasamtangang nagtrabaho niini ug kon mapakyas sila pagtiwas hangtod sa ika-10 nga andana hangtod sa birthday ni Rama sa Oktubre 28, nameligrong maputol ang ilang kontrata.
“A poor man’s hospital with a rich man services that will demonstrate care, love and compassion,” dugang sa mayor kinsa niingon nga ang serbisyo sa maong ospital libre para sa mga Sugbuanon.
Base sa kasabotan, humanon ang tambalanan sa Oktubre 28, 2022 sama sa pagkumpleto na sa 10 ka andanang edepisyo lakip sa bongbong ug bintana sa ikawalong andana.
Trabahuon ang kisame ug bentilasyon sa lower ground, linya sa tubig ug drainage para sa laboratory, dugang kwarto sa intensive care unit, kwarto sa CT scan, ubang kahimanan alang sa kaluwasan sa mga pasyente.