TUNGOD sa kalampusan sa "sentineling program" sa mga barangay nga apektado sa African Swine Fever (ASF), posibleng madeklara ang Kidapawan City og "yellow zone" sa umaabot nga bulan.

Matud ni Dr. Si Eugene Gornez, city veterinarian, nga tungod halos walay natala nga kaso sa kagaw sa dakbaya,n mahimo na kining kandidato ubos sa maong kategoriya alang sa epekto sa ASF.

Gipasabot niya nga mas istrikto ang pagdili sa paglihok sa baboy, mga produkto sa karne ug uban pa ngadto sa lugar gikan sa nataptan ug buffer zone sa ASF.

Apan tungod sa katikaran, mas mopalapad pa matud pa og suplay sa baboy ang dakbayan ilawom sa nahisgutang kategoriya.

Sa pagkakaron, naa pa sa "pink zone" ang siyudad ug aduna pay isolated cases sa kagaw apan giseguro sa beterinaryo nga kontrolado nila ang kaso.

Hugot sab nga nagbantay ang City Vet sa mga binuhing baboy nga itumod sa merkado publiko sa Kidapawan gikan sa mga lungsod nga grabeng naapektuhan sa ASF.

Una nang nang-apud-apod og hinabang ang lokal nga panggamhanan sa Kidapawan, lakip na ang ubang ahensiya sa gobyerno sa mga barangay sa siyudad nga grabeng giigo sa ASF.