ANG kampo ni Amier Mangacop, usa ka Grade 9 nga estudyante nga gipusil-patay atol sa panag-away gawas sa usa ka bar sa Davao City niadtong Sabado sa kaadlawon, Hulyo 2, 2022, nihangyo sa National Bureau of Investigation (NBI)-Davao nga husayon ang kaso kay gibati sa pamilya nga dili madumala sa kapulisan ang kaso nga patas.
Sa sulat nga gipadala ngadto kang NBI-Davao director Jonathan Balite niadtong Martes, Hulyo 5, nga gipaabot usab sa SunStar Davao, ang legal counsel sa kampo niingon nga ang pamilya nagduha-duha nga ipasa ngadto sa Davao City Police Office (DCPO) ang mga ngalan sa mga saksi ug mga ebidensiya tungod sa kahadlok nga kining tanan mawagtang ra.
Giila ang nakapatay nga si Marvin Rey Pepino, usa ka doctor non-uniformed person sa Police Regional Office (PRO)-Davao.
Ang insidente nahitabo sa usa ka bar sa eskina V. Mapa ug J. Camus Extension Streets. Subay sa suwat, anak siya ni anhing Police Brigadier General Marvin Manuel Pepino sa Philippine National Police (PNP) Anti-Cybercrime Group.
Gawas sa suwat, gihangyo usab sa pamilyang Mangacop nga i-inhibit sa San Pedro Police ug Police Regional Office (PRO-Davao Region) ang pag-imbestigar sa kaso.
Gihangyo usab sa pamilya nga ang imbestigasyon sa kaso ug mga file sa kaso, lakip na ang gidumala karon sa PNP Davao Cybercrime Unit for Forensic, ibalhin sa NBI sa samang adlaw nga gipasa ang sulat.
Sa suwat, gipanghimakak sa kampo ang pamahayag ni San Pedro Station commander Police Maj. Benkalin Baluan nga gimantala pinaagi sa Facebook nga si Mangacop giingong mipasakit pinaagi sa pagkulata sa suspek hinungdan nga nakahimo ang suspek sa pagpusil niini agi'g self-defense.
Nakig-alayon ang SunStar Davao sa NBI alang sa mga detalye sa maong butang, apan wala pa sila mitubag hangtud sa pagsuwat niining balita.