WALA pa nakapagula og pinal nga imbestigasyon ang Talomo District Fire Station sa natigayon sunog Miyerkules sa buntag, Hulyo 7, 2022, didto sa Ulas, Barangay Talomo Proper, Davao City.

Sa live interview sa Facebook sa netizen kang Agnes Trangia, iyang gihulagway ang natigayong pag-ulbo sa kalayo nga nagsugod sa usa ka tindahan nga anaa kilid sa national highway.

Taud-taod, mikanit na kini sa tupad nga tindahan nga makitang gama lamang sa light materials.

Gilayong miabot ang mga bombero ug gipasiritan ang mga kasikbit nga wala pa nasunog nga mga gambalay ug ang ubang bombero okupado sa pagpasirit og tubig ngadto sa nagdilaab nga kalayo.

Wala na kakanit ang kalayo sa daghang establisemento sa dapit diin sa pinakaulahing report, lima ka mga tindahan ang naugdaw.

Gituohang eletrical short circuit ang hinungdan sa kalayo.

Hinuon walay nakalas nga kinabuhi sa maong hitabo, wala pa sab gikataho kung pila ang damyos sa sunog.