MABULUKONG kultura ug kinaadman subling masaksihan sa mga Dabawenyo ug sa tibuok kalibutan sa ika 37th Kadayawan sa Davao karong Agosto.
Subling ipahigayon nga face-to-face human sa hugot nga restriksiyon sa pademya sa coronavirus disease (Covid-19) ang mga programa sa Kadayawan nga gikonsiderang "Festival of all Festivals".
Biyernes sa hapon, Hunyo 8, 2022, gipahigayon ang media launch sa kaugdahan sa usa ka dakong hotel sa Bajada, Davao City.
Unang hugna sa programa, gipakita sa Kalumon Performing Ensemble ang mga sayaw sa kalumaran nga usa sa mga lumadnong pasigarbo sa Dakbayan sa Dabaw.
"Kasikas sa Kadayawan" ang naingong tema sa selebrasyon karong tuiga, diin sa Agosto 5 magsugod ang mga nakahan-ay nga mga aktibidad sa selebrasyon.
Agosto 5, ablihan ang Kadayawan Tribal Village sa Magsaysay Park dungan sa matigayong Kadayawan 3D Mapping sa City Hall Facade.
Matigayon sab ang Hiyas sa Kadayawan Agosto 6 nga mao ang Cultural Presentation (Talent Night) sa Bantawan Amphitheater.
Sa Agosto 15 matigayon ang Misa Pasasalamat sa Magsaysay Park ug ang Pag-abli sa Kadayawan sa Bantawan Amphitheater.
Pagka-Agosto 16, ang Bantawan sa Bantawan Amphitheater sundan kini sa Hiyas sa Kadayawan (The Coronation) sa Agosto 17 didto sa RMC PetroGazz Arena.
Matigayon sab sa maong adlaw ang Sayaw sa Kadayawan ug matigayon na sab ang Bantawan sa Bantawan Amphitheater sa Agosto 18.
Sa Agosto 19, mahitabo ang Dula Kadayawan didto sa People's Park ug ang Bantawan Amphitheater sa Magsaysay Park.
Agosto 20, ang gikahinaman nga Indak Indak sa Kadayawan sa San Pedro Square ug ang kalingawan sa Bantawan Amphitheater.
Sa Agosto 21, mao na ang Pamulak sa Kadayawan didto sa San Pedro Square, Pitik sa Kadayawan ug ang Tambayayong sa Kadayawan sa Bantawan Amphitheater.
Gipaabot ni Davao City Mayor Sebastian Baste Duterte sa mga Dabawenyo ang mainitong pagdapit sa tanan nga mosaksi sa kaugdahan nga gikan sa mabulukong kultura ug kinaadman sa mga Dabawenyo.