Masulub-ong taho ang nisugat sa komunidad sa media sa Sugbo tungod sa pagpanaw sa laing beteranong journalist ug blogger nga si Emmanuel ‘Anol’ Mongaya, kanhi city editor sa SunStar Cebu ug managing editor sa Superbalita Cebu sukad sa pagkahimugso niini sa Oktubre 23, 1994.
Siya 61 anyos.
Sa pagsuwat ning taho, wa pa gibutyag kon unsay hinungdan sa iyang kamatayon, apan taudtaud na siyang nag-antos sa sakit sa kasingkasing, matod sa pamilya.
Si Mongaya niretiro sa trabaho niadtong 2010 ug pagkahuman ni full-time sa pag-abag sa iyang asawa nga si Doris sa pagdumala sa ilang public relations firm, PR Works.
Apan hangtod sa iyang kamatayon nagpabilin ang iyang column sa Superbalita Cebu nga mogawas matag Dominggo.
Sa wa pa gilusad ang Superbalita Cebu, siya ang gitahasan ni kanhi editor-in-chief manlalaban Pachico Seares sa pag-umol og editorial team nga maoy mopadagan sa mantalaan nga maoy mando sa kanhi chairman of the board ug founding publisher sa SunStar, manlalaban Jesus “Sonny” Garcia, Jr.
Ubos sa ilang pagtimon ni Seares ug Mongaya, ang Superbalita Cebu nahimong numero unong mantalaan base sa sirkulasiyon dinhi sa Sugbo gikan sa 90s hangtod karon.
Sa wa pa siya nisulod sa SunStar, si Mongaya nahimong correspondent sa Union of Catholic Asian News (UCAN) ug Philippine News and Features (PNF) samtang nagtrabaho isip magsusuwat sa social action office sa Redemptorists church sa Sugbo sa ulahing bahin sa 1980s.
Siya nahimong reporter sa kanhi Newstime Daily sa 1989 ug sa daling panahon nahimong managing editor sa mao nga mantalaan.
Ang nag-unang mantalaan, Sun.Star Cebu, nikuha niya isip region editor ug dayon nahimo siyang usa sa city editors sa mantalaan sa uwahing bahin sa 1992 hangtod nga gitahasan siya ni Seares sa full-time nga pagdumala sa Superbalita Cebu human nakita niini ang kalampusan sa mantalaan.
Human sa iyang pagretiro, si Mongaya nihimo og dakong kausaban sa PRworksPH.com isip usa na ka inbound marketing site.
Siya usab ang admin sa Facebook group “Maghisgot Kitag Politika, Bay” nga nahimong popular nga social media page sa mga mahiligon sa pulitika, labina sa Sugbo.
Ang haya ni Mongaya naa sa St. Peter Imus.
Matod ni Doris nga i-cremate si Anol sa Lunes, Hulyo 11, 2022.