“AT nganang sinabi, “Aku ing Sarili Ku,
gawan Ku ngan ing kayapan Kung lumabas arapan yu,
at ipasyag ke ing Lagyu ning Ginu arapan yu;
at magi kung makalam nung kaninu Ku makalam,
at mipakit kung kapakalulwan nung kaninu ku mipakit kapakalulwan.”
~ Pamaglikas | Dangka 33: Sunis 19
(Exodus 33:19)
“Karing maganaka papakit mu ing sarili mu anting maganaka;
karing alang sala papakit mu ing sarili mu anting alang sala;
karing dalise papakit mu ing sarili mu anting dalise,
karing baluktut papakit mu ing sarili Mu anting matenakan.”
~ Dalit | Dangka 18: Sunis 25-26
(Psalm 18:25-26)
“Bang ipasyag a ing Ginu matalaru Ya;
Ya ing kanakung batu, at alang nanu mang e makatud Kaya.”
~ Dalit | Dangka 92: Sunis 15
(Psalm 92:15)
“Ing dalan na ning matalaru malingatngat;
O Metung a Matalaru, gawan mung makatud ing balitang ning kanakung gasgas.”
~ Isayas | Dangka 26 : Sunis 7
(Isaiah 26:7)
“Pakisabyan la ngan ding laguma ding mambang ning Israel
at sabyan yu karela, ‘Magi kayung banal, uling aku ing Ginu banal Ku.’”
~ Lebitiku | Dangka 19 : Sunis 2-26
(Leviticus 19:2)
“Uling Aku ing Ginung kakayung Dyos.
Panwanan yu la ring sarili yu at maging banal,
At e yu gagawang marinat ing sarili yu king nanu mang kukuyug king yatu.
Uling Aku ing Ginu a migdala kekayu ibat king Eyiptu bang maging Dyos yu;
inya sa’t magi kayung banal, uling banal Ku.”
~ Lebitiku | Dangka 11 : Sunis 44-45
(Leviticus 11:44-45)
“Inya sa, atin kayu kareting tipan, makamal, linisan la ring sarili tamu
karing sablang karinatan ning laman at diwa,
papantasan ing kabanalan kapamilatan ning takut king Dyos.”
~ Kadwang Korintu | Dangka 7: Sunis 1
(Corinthians 7:1)
“Katatawlyan, kapatad, tumula kayu, magi kayung ganap,
mipasno kayu, mipatas-patas isip, bumye king kapayapan;
at ing Dyos ning lugud at kapayapan ume ya kekayu.”
~ Kadwang Korintu | Dangka 13: Sunis 11
(2 Corinthians 13:11)
“O Ginu, Ika ing Dyos ku;
Itangal da Ka, pasalamat ku king Lagyu mu;
uling dinapat kang kasdanan,
pamalak megawa king malambat nang milabas,
king kapantasa-pantasang katapatan.”
~ Isayas | Dangka 25: Sunis 1
(Isaiah 25:1)
“Ing batas ning Ginu kapantaspantasan, susubli na ing kaladwa;
Ing patune ning Ginu biatasa, gagawan na lang matenakan ding pangkaraniwan.
Ding kautusan ning Ginu makatud la, pamatulan ne ing pusu;
Ing utus ning Ginu dalise, pamasalan na la ring mata.
Ing takut king Ginu malinis, mandatilang alang angga;
Ing pamanatul ning Ginu tune; matalaru lang laganas.
Lakwas lang pipagnasan kesa king gintu, wa, kesa king labis kalingatngat a gintu;
Lakwas mayumu mu naman kesa king pulut at ding tulari ning sukle panilan.
Dagdag pa, kapamilatan da reti ing talasuyu mu mipabalan;
king pamanaluki kareti ating dakilang galal.”
~ Dalit | Dangka 19: Sunis 7-11
(Psalm 19:7-11)
***
Kakaliuguran de ring pakakalulu. Kakaluguran de ring mabandi.
Kakaluguran de ring mangalagu. Kakaluguran de ring masura. Kakaluguran de ring masikan. Kakaluguran de ring mayna. Kakaluguran de ring banal. Kakaluguran de ring mangarok.
Kakaluguran de ring malinis. Kakaluguran de Ya mu naman ding marinat. Kakaluguran de ring matas. Kakaluguran de Ya mu naman ding makasaldak at mababang dili. Kakaluguran de ring mapakumbaba. Kakaluguran de reng matenakan. Kakaluguran de Ya naman deng mangmang. Kakaluguran de ring paratut. Kakaluguran de ring malusug. Kakaluguran de mu naman ding salunan. Kakaluguran de ring makatuntun. Kakaluguran de Ya mu naman ding malilili.
Kakaluguran de ring masaya. Kakaluguran de Ya mu naman ding malungkut. Kakaluguran de ring mayupaya. Kakaluguran de Ya naman ding alang nanu mang upaya. Kakaluguran de ring alang nanu man kapurit mang upaya. Kakaluguran de ring mangatwa. Kakaluguran de Ya naman ding kayanakan.
Ala yang e kakaluguran ing Ginu uling kapantaspantasan ing Kayang pakalulu at lugud karing sabla. Ala yang kakabiran. Ala yang tutulak parayu. E uling mayap ka inya kakaluguran na ka. Ding pagdulapan na ila reng maragul a kasalanan—ding mangarok at mababang dili. Ila ring buri nang lumapit mu naman Kaya, aliwa mu ring banal—pati na ring magbanal-banalan, ding mapagkumwari at magsangkan-sangkan.
Agyang ala yang kaylangan nanu man kekatamu, kabud lumapit tamu Kaya, igulasyo ing Nwan nang Lagyu anting bingut a alang kamale-male king manawang o manayun, manangis at tutulu lwa—adwang gamat Na katamung salubungan bang kaulang matigik kisnang lugud at pakalulu. Antita Ya ing Ginu.
***
Dake Talabaldugan:
1.mililibad (pangdiwa) makapaglibad, makalibut, makapunta karing miyayaliwang dane. English – having the ability to wander, meander roam or go to different places. Alimbawa king pamangamit: “Agyang malati yang bisikleta ing saken nang Paing, mililibad ne man agyang mangarayung balen nung nu na buring miras ya.”
2.mililibang (pangdiwa) makapaglibang, malilibang king nanu mang paralan. English – being able to get diverted, avert, deviate, re-channel, or swerve one’s focus or attention. Alimbawa king pamangamit: “Mililibang ya kareng akakit nang nanu-nanung bage e naman pyalungan dapot gagawan nang pamyalungan i Gabi.”
***
MIKASING-KABALDUGANG AMANU TAMU
1.mamatukba – sari na katundu at e na ayampat inya mangapaduku ya at midurukduk ya ing ninu man a daranas kaniti.
2.undu-undu – mipipyak na keng labis a tundu dagdag pa ing mipapadukduk bigla agyang nanan mung ampatan.
3.mipapatundu – sasalakayan na ning masiring tundu, uling mekad kukulang tudtud at lalabis pagal.
4.manuyab o uyab-uyab – tanda na ning pamipatundu.
5.puyat – kulang a tudtud inya mekad mamatukba, undu-undu, mipapaytundu, uyab-uyab alang patugut.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king "garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.