GILAYONG nagpagula og pamahayag ang Police Regional Office (PRO)-Davao Region human nga nagpatabang na sa National Bureau of Investigation (NBI) Davao ang pamilya sa napatay nga 19-anyos nga si Amierkhan Pulalon Mangacop gawas sa usa ka bar sa Davao City kaniadtong Hulyo 2, 2022.
Ang opisyal nga pamahayag sa PRO-Davao napagula pinaagi sa spokesperson, Attorney/Police Major Eudisan Gultiano niadtong Sabado.
Sumala sa pamahayag nga giila sa PRO-Davao ang katungod sa pamilyang Mangacop nga mangayo og tabang sa NBI aron masusi ang insidente sa pagpamusil nga naglambigit kang Dr. Marvin Rey Pepino.
Dugang pa nga sa bahin sa PRO-Davao, isip kabahin sa ilang mandato, ang reklamo sa pagpatay uban ang tanang gikinahanglang mga dokumento ug mga ebidensiya nga nahipos sa San Pedro Police Station, gipasa na ngadto sa Office of the City Prosecutor.
Gipasaka na usab ang reklamo sa paglapas sa Section 31 sa Republic Act 10591 kun Comprehensive Law on Firearms and Ammunition.
Ang suspek gitanggong pa sa kustodiya sa nahisgutang police station samtang nagpaabot sa nagpadayon nga preliminary investigation.
Gipahibalo sa PRO-Davao nga alang sa kasayuran sa publiko, usa ka administratibong reklamo ang gisugdan na batok kang Pepino nga gidumala sa Regional Investigation and Management Division sa kapulisan sa rehiyon.