Onse ka infrastructure projects nga gipasiugdahan sa municipal government sa Barili sa habagatan-kasadpan sa lalawigan sa Sugbo nga nikantidad tanan og P29.4 milyunes nasuta nga ninglabaw sa cost evaluation sa Commission on Audit (COA).
Sa 2021 audit report, ang state auditors nakakita nga 11 ka mga proyekto, sagad naglambigit sa barangay roads, ang labaw sa cost evaluation og P4.47 milyon, diin gikonsiderar nga ‘excessive and prejudicial’ sa interes sa kagamhanan.
Sumala sa report sa COA, ang municipal government sa Barili nisulod og nagkalainlaing kontrata sa 2021 alang sa infrastructure projects.
Kini ang mga proyekto nga concreting sa Daro, Poblacion-Ylaya, Gunting Road, Poblacion-Gunting uban sa contract price nga P1.49 million; concreting sa Malolos-Lantawan Road sa Sitio Lantawan uban sa contract price nga P2.9 million; concreting sa Tagaytay Dakit Road sa Sitio Tagaytay uban sa contract price nga P1.9 million; concreting sa Kangdampas Road sa Proper uban sa contract price nga P1.49 million;
Concreting sa Budbud Road ngadto sa Proper uban sa contract price nga P1.99 million; upgrading sa local access road sa Candugay uban sa contract price nga P1.9 million; concreting sa Balao-Kangdampas road uban sa contract price nga P5.9 million; concreting sa Mantayupan road ngadto sa barangay hall sa Mantayupan uban sa contract price nga P1.99 million; concreting sa Tal-ot Allen Road uban sa contract price nga P1.49 million; upgrading sa local access road sa Dakit uban sa contract price nga P2.9 million; ug concreting sa CTU-Cagay Proper Road uban sa contract price nga P5.1 million.
Girekomendar sa COA ngadto sa mga opisyal sa Barili, labi na sa municipal engineer, sa pagsumiter sa pagpasabot kon nganong nilabaw ang contract cost sa 11 ka mga proyekto sa pagbana-bana sa COA.
Ilang girekomendar sa municipal government nga magbantay sa pag-andam sa cost estimates.
TUBAG
Ang mga opisyal sa Barili nitubag sa audit report sa COA nga bugtong nisumiter pagpasabot kon nganong ang contract cost sa unom sa 11 ka road projects nidako.
Sumala sa ilang tubag, pipila sa mga proyekto nilapas sa contract cost human nalakip niini ang gasto sa demolisyon sa mga daang edipisyo sa wala pa gipatuman ang pagtrabaho sa proyekto.
Gawas niini, ang contract cost sa road projects nidako tungod sa ubang aspeto sama sa presyo sa materyales nga maglahilahi depende sa supplier ug lokasyon.
Laing factor nga gikonsiderar sa municipal officials mao ang overhead, contingencies ug miscellaneous (OCM) ug profit margin sa contraktor.
“Most POWE (Program of Works and Estimates) considered 22 percent as markup for OCM and Profit which is the maximum. The LGU always considered a 14 percent mark-up to make sure funds will be saved for the project,” sumala sa ilang tubag.
Sa ilang rejoinder, ang mga state auditor nagkanayon nga mohimo sila og dugang pakisusi sa gisumitir nga tubag sa LGU sa Barili sa COA’s Regional Technical Services Office aron ilang masuta ang merito sa tubag sa maong mga opisyal.