GIDUSO ni Davao City First District Representative Paolo Duterte ang balaudnon nga nagdili sa pagpapalit og ilimnong makahubog ngadto sa mga indibiduwal nga ubos sa edad nga 21 anyos.
Si Duterte, uban ni Representative Eric Yap, miduso og House Bill No. (HB) 1753 o ang Anti-Underage Drinking Act nga gipublikar sa mga tigbalita niadtong Martes sa gabii, Hulyo 12.
Ang balaudnon, matud niya, nagdili sa pagpapalit sa di kuwalipikado nga indibiduwal og ilimnong makahubog.
Ang pasabot sa "unqualified individuals", sumala sa HB 1753, nagtumbok sa mga edad nga ubos sa 21 anyos, o bisan kadtong labaw sa 21 apan "are unable to fully take care of themselves or protect themselves from abuse, neglect, cruelty. exploitation or discrimination because of a physical or mental disability."
Ang explanatory note sa balaudnon, ang nangamahan nagtumbok sa pagtuon sa World Health Organization (WHO) sa Global Strategy to Reduce the Harmful Use of Alcohol kay ang ilimnong makahubog mao ang ikatulong nag-unang risk factor alang sa "poor health globally" kay hinungdan kini sa gibanabana nga 2.5 milyon nga kamatayon matag tuig.
Ang pagtuon sa WHO nagtin-aw nga ang kamatayon kasagaran mahitabo sa mga kabatan-onan.
Dugang pa niini, ang mga nangamahan sa balaudnon nagsulti sab nga ang Pilipinas mao ang usa sa mga miyembro nga estado sa WHO Resolution WHA63.13, nga "primarily provides for a global strategy towards improved health and social outcomes for individuals, familities and communities to considerable reduce morbidity and mortality due to harmful use of alcohol and their ensuing social consequences".
Apil sa gidili mao ang "unqualified individuals" nga makahupot, makapalit, mohatag og alcoholic drinks. Mga establisemento ug qualified individuals kinsa mamaligya og ilimnon mahimo sab nga manubag.
Mga "unqualified individuals" kinsa mosupak sa balaudnon moatubang sa Barangay Council for the Protection of Children (BCPC) alang sa "counseling" una kini ibalik ngadto sa ginikanan o guardians alang sa unang salaod.
Ang ikaduhang salaod, kinahanglan nga motambong sila, uban sa ilang ginikanan o guardians, duha ka sunod-sunod nga regular sessions sa counselling sa BCPC. Kadtong di motambong sa counseling mopailwom og "disposition" sa Department of Social Welfare and Development (DSWD).
Alang sa ikatulo ug sagunsong pagsupak, mga hingtungdan ipasa ngadto sa DWSD nga dunay hurisdiksiyon sa lokalidad kon asa nagpuyo ang kabataan alang sa "counseling and disposition".
Mga establisemento ug kadtong naa sa legal nga edad nga makasupak sa balaudnon pahamtangan og P50,000 multa o pagkapriso nga di molapas og tulo ka bulan. Alang sa sagunson nga pagsupak, ang duha ka silot mahimong mapatuman, ug ang pagbawi sa lisensiya sa badlungon nga establisemento.