GIANUNSYO karon sa Department of Social Welfare and Development (DSWD) nga gikatakdang tanggalon sa listahan sa Pantawid Pamilyang Pilipino Program (4Ps) ang hapit usa ka milyon ka mga benepisyaryo.
Kini ang gibutyag mismo ni Social Welfare Secretary Erwin Tulfo niadtong Lunes, Hulyo 11, 2022, diin suma sa opisyal, mga "undeserving" kon di angay nga mga 4Ps beneficiaries nga kasamtangang gi-review karon sa DSWD.
Sumala sa Dabawenyo nga si Macario Relampagos, 44, traysikad drayber sa Piapi Boulevard, Davao City nga angay gayod nga kini ang himuon sa DSWD.
Niya pa nga bisan siya mokita lamang og P110 sa matag adlaw isip traysikad drayber samtang ang iyang asawa mokita og P150 ang ginansiya sa pagpaninda og hotcake ug pinirito nga saging, kinsa dunay upat ka mga menor de edad pa nga anak.
"Pait kaayo sa kinabuhi, naibog gyud tawon mi anang 4Ps pero wala pa gyod mi nasulod naa mi sa waiting list, basin karon masulod na, daghang salamat idol (Raffy) Tulfo, aksyoni gyod ang hiwi sa DSWD, daghan pod makakaya na sa pamuyo ang naa sa listahan, kami tawon, pait kaayo dili kanunay ang income," saysay sa traysikad drayber sa Superbalita Davao Miyerkules.
Sumala ni Tulfo nga kadtong mga pamilya nga adunahan nasa kinabuhi ang tanggalon ug ilisan sa mga bag-ong mga beneficiaries, labi na nga daghan ang mga anaa sa waiting list.
Sa kasamtangan, anaa sa 4.4 million beneficiaries sa tibuok nasud ang nalakip sa 4Ps, diin gi-review kini karon kon kinsa ang mga angayan nga magpabilin o dili sa maong programa.
Base sa report sa World Bank, anaa lamang sa 60 porsiyento sa mga recipients sa 4Ps niadtong 2020 ang nalakip sa poorest of the poor o kadtong walang-wala sa pamuyo nga angayan ug kuwalipikado sa cash subsidy program.
Gisuwayan pa og kuha sa Superbalita Davao ang bahin sa DSWD-Davao Region kon nagpatuman na ba sab ang maong ahensiya ngari sa pag-review sa listahan sa 4Ps beneficiaries subay sa mando sa bag-ong sekretaryo.