HALOS tunga sa milyon ang kantidad sa gituohang shabu nga narekober sa kapulisan sa Toril Police Station atol sa gilusad nga buy-bust operation pasado alas 2 sa kaadlawon, Hulyo 13, 2022.
Ang dinakpan giila sa Toril police nga si alyas Agaw, 27, ulitawo, drayber, nagpuyo sa Barangay Marapangi, Toril District, Davao City.
Sumala sa Toril police, dugay na nilang gipanubayan ang ilegal nga lihok sa suspek, hangtud nga nakig-koordinar kini sa nagtakuban nga pulis nga mobaligya og ilegal nga druga.
Gilayong gikasa sa Toril police ang buy-bust operation nga miresulta sa malampusong pagkasikop sa suspek.
Nakuha sa posisyon sa suspek ang 30.4 gramos nga shabu na nagkantidad og P425,600, cellphone ug marked money.
Si alyas Agaw gikonsiderang top 5 drug personality sa regional level, kinsa balhog na karon sa selda sa Toril Police Station ug gikatakdang pasakaan og kaso karong adlawa didto sa korte.