SA HUGOT nga pagbantay sa Task Force Davao ug sa kapulisan sa Davao City Police Office sa mga checkpoints ning siyudad, wala milampos ang mga tawo nga dunay ilegal nga dala pagsulod sa dakbayan.
Sa impormasyon gikan sa Public Information Officer sa TF-Davao Captain John Louie Dema-ala, mokantidad sa P36,800 sa gituohang shabu ang nasakmit sa awtoridad alas 3:30 sa kaadlawon, Hulyo 14, gikan sa usa ka alyas Bonbon, 35-anyos, ug residente sa Purok 4 Nalum, Bago Gallera, Davao City.
Sayo niini, gipahugtan sab ang joint checkpoint operation sa Task Group Falcon ug Toril Police Station nga miresulta sa pagkasakmit sa mga ismagol nga sigarilyo didto sa Sirawan checkpoint.
Ang suspek usa ka alyas Mark, 24-anyos, taga Maitum, Sarangani Province, kinsa sakay sa usa ka Public Utility Vehicle pasulod unta sa Davao City, apan wala kini milampos.
Nakuha gikan sa posisyon niini ang 25 ka mga reams sa ismagol nga Astro ug Fort cigarettes nga dunay street value nga P12,500.
Tungod niini, gidayeg ni Task Force Davao Commander Colonel Darren E. Comia ang mga tropa gumikan sa mga mandato aron masiguro nga ang mamahimong luwas Davao City dili lang sa mga hulga kondili sa mga ilegal nga elemento.
Gipahinumdoman usab sa opisyal ang mga Dabawenyo sa paghimo sa upat ka mga buhat sa Culture of Security nga mao ang Report, Remind, Participate, Volunteer aron makab-ot ang mas luwas nga komunidad.
Ang mga suspek ug ang mga nakumpiska nga butang gi-turnover nga ngadto sa istasyon sa kapulisan.