Supak si Mayor Michael Rama sa plano sa Metro Cebu Water District (MCWD) sa pagpatuman sa dakong umento sa taripa sa tubig sugod sa Hulyo 1, 2023.
Sa pamahayag ni Rama, niila ang mayor sa katungdanan sa kagamhanan sa pagseguro sa batakang serbisyo sama sa tubig, apan iyang gipasabot nga responsiblidad usab niya ang pagsupak kon ang katawhan makasinati og dugang kalisod, labi na ning panahona.
“While MCWD will impose a new tariff yet by July 1, 2023, to impose it at an abrupt rate of 60 percent is rather unreasonable, especially when we still work to recover from the effects of the pandemic and recent calamities..,” tipik sa pamahayag ni Rama nga gipada sa media.
Ang mayor nisugyot sa MCWD Board sa paghimo og dugang review sa ilang plano nga bag-ong taripa ug mokonsiderar sa hinayhinay nga pagpatuman sa umento hangtod sa 2025 aron dili bug-at sa mga konsumidor.
Gidasig sa mayor ang paghimo sa ubang mga proyekto sa pagpalambo sa tinubdan sa tubig sama sa desalination, dam ug uban pa aron makasuporta sa nagkataas nga panginahanglan sa tubig sa paspas nga naglambong dakbayan.
Lakip sa iyang awhag sa City Council sa pagpatawag og public hearing aron makapadayag ang mga konsumidor bahin sa plano sa MCWD nga umento ug aktibong moapil sa pagtuki sa pagpalambo sa serbisyo ug pagseguro sa igong tinubdan sa tubig.
Ang mayor buot nga hingpit makabangon ang dakbayan gikan sa krisis ug tumong niya ang kalamboan sa dakbayan sama sa Singapore.
PLANO SA MCWD
Ang MCWD nagplano nga mopatuman og 70% nga usbaw sa bayranan sa tubig nga bahinon sa duha ka tuig sugod Hulyo 1, 2023.
Si Atty. Jose Daluz III, chairman sa Board of Directors sa MCWD, nagkanayon nga 60% ang ilang ipatuman sa Hulyo 2023 ug 10% paglabay sa usa ka tuig.
Dugang niya nga base sa guidelines, ang Local Water Utilities Administration (LWUA , motugot nga makapatuman og price adjustment matag lima ka tuig ang water utilities apan, ang MCWD wala makahimo pag-usab sa presyo sa tubig sulod sa walo ka tuig.
“Daghan kita og nahimo nga investment sa MCWD to raise our water source and it’s time to adjust our rates kay for 8 years gi-absorb sa MCWD ang mga expenses. In fact na depleted na gani ang back-up nga reserve sa MCWD because sa pag-absorb sa mga expenses without asking the public to adjust our tariff. I think it’s time to adjust our tariff kay di man sab kaayo taas,” paghulagway ni Daluz.
Matod sa opisyal sa MCWD Board nga kadtong nagkonsumo og 10 cubic meters matag adlaw, kinsa nagbayad og P183.17 matag buwan, mahimo na kining P250.51 sa Hulyo 1, 2022 kun usbaw nga P67.34 matag buwan.
Ang baligya sa matag cubic meter sa tubig sa MCWD nga gikonsumo sa libuan ka mga panimalay anaa lang sa P15.20 matag cubic meter sa unang 10 cubic meters sa usa ka buwan.
“Out of 130+ ka water district all over the Philippines, we are in the top 10 as to the cheapest water even with this adjustment we will still be on the top 10 on the cheapest rate,” dugang ni Daluz.
Ang MCWD nigasto og P2.1 bilyunes para pagpatuman sa mga programa ug proyekto aron modaghan ang supply sa tubig gikan niadtong 2015 hangtod 2022 ug sa mosunod nga mga tuig, nadugangan og 80 million liters per day (MLD),naka-ilis og 12 kilometros nga pipelines, duha ka septage treatment facility nga nahimutang sa lungsod sa Cordova ug sa Cebu City.
Moabot usab ngadto sa P12 bilyones ang operating expenses sa MCWD sa miaging walo ka tuig gumikan usab sa pag-absorb nila sa mga gastoan aron ma-subsidize ang 99% sa mga konsumidor sa water district nga gilangkuban sa mga household.
Nakataod usab sila og 140 kilometros nga linya sa tubig, 1000 MLD nga new modular water tank nga nahimutang sa barangay Kalunasan ug 57,000 ka service connections ang ilang nataod.