Ang mga pangulo sa traffic bodies sa Dakbayan sa Sugbo, Mandaue ug Talisay nagtagbo sa Huwebes, Hulyo 14, aron pagtuki sa komon nilang mga suliran sa trapiko ug pagpatuman og hiniusang mga polisiya.
Si Jonathan Tumulak, pangu sa City of Talisay Traffic Operations and Management (CT-TODA), sa phone interview sa Superbalita Cebu, niingon nga ang panagtagbo gitumong aron hiniusang mapatuman ang mga ordinansa sa trapiko sa tulo ka mga siyudad.
“Ang mga ordinansa sa tulo ka mga siyudad mao-mao ra (managsama),” matod ni Tumulak, busa angay lang nga dunay koordinasyon ang pagpatuman sa mga lagda.
Ilang gituki ang mga pagpataka lang sa pagpadagan sa mga nagmotorsiklo ingon man ang di pagtahod sa mga nagbiseklita sa traffic rules.
Ilang nalantawan nga kon magkahiusa ang polisiya sa tulo ka mga siyudad, moluagluag ang dagan sa trapiko bisan sa congested na nga mga karsada.
Ang CT-TODA nagpatuman sa outer lane o right lane only sa mga motorsiklo sa N. Bacalso Avenue ug Cebu South Coastal Road (CSCR) taliwa sa daghang mga disgrasya nga nalambigitan sa two-wheeled nga mga sakyanan.
Atol sa tigom sa usa ka kan-anan sa dakbayan sa Sugbo, ningtambong sila si Cebu City Traffic Operations and Management Board chairman Rico Rey “Francis” Holganza, Traffic Enforcement Agency of Mandaue (TEAM) executive director Edwin Jumao-as ug Team operations chief Arnold Malig-on.