GIINGON nga nagbilin pa og pahimangno ngadto sa iyang kapuyo ang lalaki nga nagpakamatay didto sa Phase 1, Cristory Village, Barangay Magugpo West, Tagum City.

Ang biktima giilang si Jelquin Arsenio Bersano, 21, laborer kasamtangang nanimuyo sa nahisgutang dapit apan lumad nga taga Purok 18, Barangay Poblacion, Mawab, Davao de Oro.

Base sa imbestigasyon sa kapulisan, nasayran nga una natulog ang kapuyo sa biktima nga si Angelica Calinda Lojico, nakit-an pa niya kini nga nanihapon alas 7:30 sa gabii Miyerkules, Hulyo 13, 2022.

Apan sa dihang nakamata si Angelica alas 12:12 sa tungang gabii, maoy misugat sa iyang mga mata ang biktima nga nagbitay gamit ang pisi nga nylon nga gihikot sa iyang liog.

Matud pa nga gidali pagbadbad ni Angelica ang pisi nga nakahigot sa liog sa biktima ug dayong nanawag og tabang.

Apan nasayran nga ang biktima wa na matabang sanglit nabugtoan na sa kinabuhi.

Nasayran nga namulong nang daan ang biktima nga maghikog siya ug nagbilin og "last will" sa iyang kapuyo nga bantayan ug kanunay'ng tan-awon ang ilang anak.

Wa'y nakit-ang foul play ang kapulisan sa kamatayon sa biktima nga gilamayan na sa iyang pamilya ug mga kabanay. Sa mga nakasinati og depresyon ug nangita og ma-istorya, mamahimong mokontak sa 0966-351-4518/0917-899-8727 ug 0917-899-USAP alang sa Globe/TM Subscribers samtang 0908-639-2672 sa Smart/Sun/TNT Subscribers.

Mahimo sab Hopeline ug National Center for Mental Health Crisis Hotline sa Pilipinas: Hopeline PH's 24/7 hotlines: 0917-558-4673 (Globe) 0918-873-4673 (Smart) 02-88044673 (PLDT) 2919 (toll-free for Globe and TM).