“Mabilis yang maging makatuliran at darasnan na ing lalambat a kapayapan.
O anak nang Kunti, ipasyag mung matepangan a ing talasuyu Ku e ya mamamate.
O anak nang Prita, deng magsantung Kanaku, bista’t mibait lang mababa—
babai, magbaliwas, talapanggawa—malyari dang dasnan ing kakataskatasang parasan.
Makananu la kadakila kanita ring bramanas, ding matalaru, ding talasuyu at banal a ari atsu keting labwad a kisna king kasakitang ayni a makasuglung king malugud a kasuywan Kanaku.
Itingid meng parati Kanaku ing isip mu a mimisip kanaku, manampang kagalangan
at sasamba Kanaku. Uling makagunam kang lusuk kanaku, bitasa ing miras ka Kanaku.
~ Dalit ning Kakataskatasang Panginwan | Dangka 9:Sunis 31-34
(The Song Of God | 9: 31-34)
“Apamalino Ku na ngeni ing pekamapampan karing sablang belwan.
Pakapanigaralan mu iting masalese, at kanita daptan mu ing buri mung daptan.
Pauli ning ika pekamakamal da kang kakaluguran, sasabyan Ku keka
ing pekamapampang dake ning belwan. Pakirandaman mu Kanaku iti,
pauli ning para king ikakayap mu iti.
Parati mu Kung isipan at magi kang talasuyu Ku. Samban mu Ku
at midaun kang pamigalang Kanaku. Kanita dasnan Mu kung alang kabaligon.
Pangaku Ku keka ini uling ika ing Kanakung pekamakamal a kakaluguran.
Lakwan mo ngan ding sablang kauryan ding kapanyamban at sumuku ka Kanaku.
Ikabus da ka karing sablang kablas ding kasalanan. E ka tatakut.”
~ Dalit ning Kakataskatasang Panginwan | Dangka 18: Sunis 63-66
(The Song Of God | 18: 63-66)
***
Ababasa mu at akakit keng Facebook ngening kasalungsungan ing akagaywan da na reng tau ing “Masayang Aldobeytan keka king Banwa!” o “Happy Birthday in Heaven!” Sana all, ngara ping sasabi. Sana pin tutu ita. Sana pin antita kasaguli ing pamanuli banwa. Kembage saguli mu nung balu mu ing paralan. Masulit nung ali. Oneng e naman tutu ing tambing miras ka banwa mu kabud. E ya cheap o mura at saguli ing pamanuli banwa nung makalabwad ing pamibye-bye mu. Nung balang penandit ing yatu yang laman ning isip mu. Agyang kaluguran na katamu ning Apung Ginu, e antita kasaguli. E antita, abe.
Nung nanu o ninu ing ati yu king isip mu king tawling penandit ning inawa mu—ya mu namang dasan mu. Patas mu ita. Patas ya ing Apung Ginu. Kasi nung nanu o ninu ing parating isipan mu mangabaldugan a ita ing maulagang dili keka. Ita ing pakamalan mu. Ita parati ing dirinan mung panaun, pagal at pigagastusan nanu man ing malyari keka. Inya ita ing mitagan keng pamisip mu angga na king tawli mung inawa. Ita mu. Bitasa ita.
Nung masaya ka, Ya ing isipan mu. Nung malungkut ka, Ya ing isipan mu naman. Nung masakit ka, Ya ing isipan mu. Nung ala kang sakit, Ya mu naman ing isipan mu. Nung lipit ka at agyang singku mu ala ka, Ya ing isipan mu. Nung dakal ka salapi Ya mu naman ing isipan mu. Nung magkakasakit ka, Ya ing isipan mu. Nung manawa ka pamibye-bye, Ya ing isipan mu naman. Nung dakal ka kakaluguran, Ya ing isipan mu. Nung likwan da ka ngan ding kakaluguran mu, Ya mu naman ing isipan mu. Nung sisikat ka, Ya ing isipan mu. Nung ala nang makaganaka keka metung man, Ya mu naman ing sukat isipan mu.
Nung alang papansing keka at kareng posts mu keng Facebook o Instagram, Ya ing isipan mu. Hahaha! Nung mag-viral balang post mu kareng sablang social media, Ya pa mu rin ing isipan mu. Ya mu ing pekamaulaga keka. Ya mu ing pekamakamal mung dili at alang aliwa pa.
Inya sa’t Ya ing bye mu. Ya ing inawa mu. Ya ing dayang durut-durut karing uyat mu. Ya ing kauran mu. Ya mu naman ing kaleldo mu. Ya ing lisangan at ya mu naman ing dimlang asna kanyaman at makapasno. Ya ing danum a inuman mu. Ya mu naman ing aping paglutu mu. Ya ing seganagana mu at ya ing sabla para keka. Ala nang aliwa nung e mu Ya.
Ninu pa ing dasnan mu king sumangid a bye nung aliwa Ya? Nung e me kakalingwan—Ya mu!
***
mililiko/mililiku (pangdiwa) makapagliko o makapagliku, makapildis patalindiking king kayli o wanan a dane o dalan. English – gets to turn sideways, or swerve, cut, sheer, veer, yaw, zig or zag; pivot, curve, hook, curl, spiral, twist, coil. Alimbawa king pamangamit: “Masakit ing mililiko bigla neng papagana kang saken keng mataluras dalan neng benging madalumdum na at e mu pa gamat ing daralanan mu.”
mililili (pangdiwa) ninu man o nanu man maging sangkan malili o milisya king pupuntalan. English – someone or something that causes anyone to get lost or deviate, digress, drift, or veer away. Alimbawa king pamangamit: “Ing kaparatutan ning tau yang mililili keng masampat a bunga ning kapakumbaban na .”
mililiga (pangdiwa) milalaga mu naman; ninu mang maglutung liga king nanu mang pamangan. English – someone who boils, simmers, seethes, stew something for food. Alimbawa king pamangamit: “Disnan ke ing dara ku mililiga yang mais a maputi uli kanung sinawa ne keng pamamangan tinape aldo’ldo.”
***
MIKASING-KABALDUGANG AMANU TAMU
dulum – ing keyalang sala; neng alang makaslag a sulu, aldo o bulan.
dalumdum – ing kabilyan neng bengi angga king bayu mag-munag; alang makasinding sulu, makaslag a aldo o bulan pati na batwin.
lulam – ing malilyari neng bayu muran, pamagdalumdum nang bagya ning banwa pauli ding makapal a bigang uran.
tukup– pamaglaganas ning dalumdum pauli ning paratang o ati na ing uran—bengi man o aldo
pisak – kelang akakit pauli ning dalumdum o kelang aslag; kabilyan da mata ring bulag.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com/ mag-text o maus para karing kutang o munikala: 0942-3924-399 o 0945-3795-270.